Baş verən insidentin bütün hallarını, videoyazıları, radiodanışqları və telemetriya məlumatlarını araşdırdıqdan sonra stüardlar müəyyən ediblər ki, boksdan trasa çıxış anında komanda Piastriyə arxasında Maks Ferstappen və Liam Lousonun olduğunu bildirib və bunu nəzərə almalı olduğunu xəbərdarlıq edib. Dinləmələr zamanı Oskar izah edib ki, ona Red Bull-un hər iki sürücüsünün sürətli dövrədə olduğu deyilməyib və o, Maksın sürətli dövrədə olduğunu yalnız ilk döngəyə yaxınlaşanda anlayıb.
Bundan sonra Piastri xeyli sürətini azaldıb və Ferstappeni buraxmaq üçün daha sağa çəkilib, lakin Lousonu bloklamaqdan yayına bilməyib, çünki o, komanda yoldaşının arxasınca həddindən artıq yaxın məsafədə gedirdi.
Stüardlar etiraf ediblər ki, həmin vəziyyətdə Piastrinin başqa cür davranmaq imkanı olmayıb və Lousonun bloklanması qəsdən baş verməyib. Bununla belə, reqlament pozuntusu faktı qeydə alındığı üçün Piastriyə bu cür hallarda nəzərdə tutulan standart cəza – startda üç yer itirmək cəzası verilib.
