Qari Anderson: “Çempionatın sonuna getdikcə daha az yarış qalır və artıq aydındır ki, əgər Kimi titulu əldən versə, bu, kiminsə onu qabaqlaya bilməsinə görə yox, yalnız öz səhvi ucbatından olacaq.
Avqustun sonunda onun 20 yaşı tamam oldu və Monzada 19-cu yerdən start alaraq qələbə qazandı. Üstəlik, maşını salamat saxlamağı, ön qanadı itirməməyi və çınqıl tələsinə düşməməyi bacardı ki, bu da belə yaşda artıq onun yetkinliyindən xəbər verir.
Əgər o, peşəkar baxımdan inkişafını davam etdirsə və yeni uğurlar qazansa, mən tam əminəm ki, çempionluqlar onu çox yüksək səviyyəyə qaldıracaq və o, hərəsinin aktivində yeddi titul olan Mixael Şumaxeri və Lyuis Həmiltonu da geridə qoya biləcək.
Razıyam, bir dəfə trasdan kənara çıxmışdı, yəqin ki, bizim görmədiyimiz daha bir neçə xırda səhvi də olub, amma ümumilikdə doğma mövsüm mərhələsində təzyiqin öhdəsindən gələrək yarışı qüsursuz keçirdi.
Ferrari-nin maşınının sürətinin podium uğrunda mübarizəyə imkan vermədiyi bəlli olanda, tifozilər bütün ehtirasları ilə Antonelliyə azarkeşlik edirdilər və Monzadakı bu qələbə onun yaddaşında əbədi qalacaq. O, son 60 ildə bu trasda Formula1 yarışında qələbə qazanan ilk italiyalı oldu və indi publika yəqin ki, onu onqat artıq dəstəkləyəcək.
Əgər kimsə Corc Rassellin qələbəni komandanın virtual təhlükəsizlik maşını (VSC) rejimi tətbiq olunanda onu pit-stopa çağırmamasına görə əldən verdiyini düşünürsə, bu, tam cəfəngiyyatdır. Şəxsən mən Mercedes-in strateqlərinin yerində olsaydım, eyni cür hərəkət edərdim.
Rassell sərt təkərlərlə gedirdi və cəsarətlə finişə qədər onlarla çatmağı planlaşdırırdı, Antonellinin maşınında isə Medium təkərlər vardı və bütün yarış məsafəsini onlarla qət etmək onun üçün bir qədər çətin olacaqdı – yəqin ki, son beş dövrə ərzində problemlər başlayacaqdı. O bu təkərlərin təzə dəstini götürmək üçün pitə yollandığına görə mövqe itirdi və buna görə də sonradan geri qayıtmaq üçün limitdə hücum etməli oldu.
Amma yenə də ona bir irad bildirərdim: finişə az qalmış yarışın ən sürətli dövrəsini vurmağa heç bir ehtiyac yox idi, çünki o, onsuz da lider gedirdi. Əlbəttə, sürücü bütün sürət imkanlarını nümayiş etdirəndə bu, təsir bağışlayır, amma bunda qətiyyən zərurət yox idi. Kiminin yarış mühəndisi Piter Boninqtonun onunla danışacaq mövzusu olacaq.
Qeyd etmək lazımdır ki, Antonelli sərt təkərlərlə start almışdı və onlarla çox dövrə getməyi planlaşdırırdı, amma yarış qırmızı bayraqlarla dayandırıldıqdan sonra iki fərqli slik tərkibindən istifadə tələbinə əməl etmək üçün Medium-a keçməkdən başqa seçimi qalmadı.
Ferrari və onun sürücülərinin ilk dövrədə birinci şikanadakı qarşıdurmasına gəlincə, şəxsən mən hesab edirəm ki, Həmilton komanda yoldaşına qarşı həddindən artıq aqressiv davrandı. Sonra isə Lekler Parabolica-dan çıxışda maşını dağıtdı və bütün bunlar Skuderiyaya podium uğrunda mübarizə aparmağa imkan vermədi, baxmayaraq ki, məncə, SF-26-nın tempi istənilən halda kifayət qədər yüksək deyildi. Ümumilikdə, Maranelloda bunu etiraf etməli və öz problemlərini araşdırmağı davam etdirməlidirlər.
Şübhə etmirəm ki, Ferrari üçün bu, doğrulmayan ümidlərlə yadda qalan daha bir mövsüm olacaq – sadəcə ona görə ki, onların maşını kifayət qədər yaxşı deyil”.
