Şarl Lekler: “Mən onunla razı deyiləm, amma hər kəsin öz fikri ola bilər. Hər halda, əslində kimin daha sürətli olduğunu heç vaxt bilməyəcəyik, ona görə də bunu müzakirə etməyin mənası yoxdur.
Sinqapurda necə çıxış etdiyimizdən razı qalmışıq, amma hələ də sürətlənməliyik. Red Bull artıq bir neçə yarışdır bizdən daha sürətlidir və hazırda yüksəlişdədir. Bu tendensiyanı qırmalı və liderliyi özümüzə qaytarmalıyıq.
Əminəm ki, Mercedes gec-tez yenilikləri ilə bağlı problemləri həll edəcək və komandanın əvvəl olduğu səviyyəyə qayıdacaq. Eşitdiyimə görə, McLaren Ostinə çoxlu yenilik gətirib, ona görə də maraqlı olacaq. Düşünürəm ki, hazırda bütün komandalar bir-birinə kifayət qədər yaxındır və mübarizənin taleyini xırdalıqlar həll edir. Bizim vəzifəmiz qalanlarını qabaqlamaqdır”.
Ferrari sürücüsü əlavə edib ki, onun üçün komandaya Mühəndislər Kubokuda ikinci yeri qazandırmaqla yanaşı, mövsümün qalan yarışlarında qələbələr uğrunda mübarizə aparmaq da vacibdir.
“Bizim üçün hər mərhələyə ayrılıqda köklənmək və mövsümün sonuna qədər mümkün qədər çox yarış qazanmağa çalışmaq vacibdir, – deyə Lekler davam edib. – Nəticədə bu, bizə Mühəndislər Kubokuda ikinci yeri təmin etməlidir.
İkinci yerin özü mənim üçün o qədər də böyük əhəmiyyət daşımır. Əlbəttə, bu, üçüncü yerdən yaxşıdır, amma böyük sevinc gətirməyəcək. Əgər yenidən qələbələr uğrunda mübarizə apara bilsək və ilin sonuna qədər bir neçəsini qazansaq, bu, qat-qat yaxşı olar. Bu, yaxşı əlamət olacaq və növbəti mövsümə nikbinliklə başlamağa imkan verəcək”.
Bu günlərdə sosial şəbəkələrdə Şarl Leklerin uşaq arabasını söküb-yığmağı öyrəndiyini əks etdirən video yayılıb. Məsələ ondadır ki, mövsümün sonuna qədər o, ata olmalıdır, amma moneqask əmin edib ki, bu, yarış həftəsonlarında ona heç cür mane olmayacaq.
Şarl Lekler: “Düşünmürəm ki, buna görə qalan yarışlardan hər hansı birini buraxım. Əlbəttə, mərhələlər arasında evdə mümkün qədər çox vaxt keçirmək üçün əlimdən gələni edəcəyəm. Ola bilər ki, trasa həmişəkindən bir qədər gec gəlim, amma yarışlarda iştirak edəcəyəm”.
