2025-ci ildə yeni Amerika komandasının debüt mövsümündə Serxio Peres və Valtteri Bottasla çıxış edəcəyi açıqlananda belə təəssürat yaranmışdı ki, söhbət uzunmüddətli müqavilələrdən gedir. Lakin Racer yazır ki, TWG Motorsports-un icraçı direktoru və Formula1-də Cadillac proqramının rəhbəri Dən Tauriss komandayla Kolton Hertanı görmək niyyətində olduğuna görə, görünür, Budkovskinin şərhlərini məhz bu kontekstdə qəbul etmək lazımdır.
“Mən komanda rəhbəriyəm və hazırda bazarda olan bütün sürücülər, yaxud onların menecerləri mənə zəng edir, – deyə Budkovski bildirib. – Əminəm ki, digər komandaların rəhbərləri də eyni sözü deyəcək. Ümumiyyətlə, mənimlə əlaqə saxlayan bir sıra sürücülər və menecerlər var. Adlarını çəkmək fikrində deyiləm, amma deyə bilərəm ki, gələn mövsüm üçün müqaviləsi olmayanların çoxu ilə ünsiyyətdəyik.
Ancaq təsəvvür etdiyiniz kimi, heyətimizlə bağlı məsələləri açıq şəkildə müzakirə etməyə hazır deyiləm, çünki bunu etsəm, Cadillac-ın marketinq şöbəsindən və mətbuat xidmətindən ciddi irad eşidərəm! Ona görə də sürücülərlə müqavilələrə münasibət bildirməyəcəyəm; vaxtı çatanda bunu rəsmi press-reliz vasitəsilə açıqlayacağıq”.
Kolton Herta dünən Serxio Peresin sükanı arxasında test keçib və bundan sonra yaxın həftələrdə gələcəyi ilə bağlı xəbərlər gözlədiyinə işarə vurub:
“Düşünürəm ki, məqsədim dəyişməz qalır: Formula1-də çıxış etmək istəyirəm, buna layiq olduğumu sübut etmək istəyirəm. Buna görə də komandayla işləməyə davam edirəm, ustalığımı artırmağa çalışıram, eyni zamanda Cadillac maşınını daha yaxşı etməyə kömək edirəm. Amma əlbəttə, ideal variant Formula1 maşınını idarə etmək olardı.
Nə vaxt və nə elan olunacağını bilmirəm, amma bu nə qədər tez baş versə, mənim üçün bir o qədər yaxşıdır. Təbii ki, gələn il artıq komandanın əsas heyət sürücüsü olmaq istərdim. Ancaq bunun mümkün olub-olmadığını bilmirəm. Bunu bizim rəhbərlərdən soruşmaq lazımdır.
Ümid edirəm ki, bir neçə həftəyə vəziyyətə aydınlıq gələcək və komandanın gələn illə bağlı planlarının nə olduğu bəlli olacaq. Amma buna qədər hələ xeyli məsələni həll etmək lazımdır”.
Ən vacib məsələlərdən biri FİA superlisenziyası ilə bağlıdır və dünən Ostində keçirdiyi məşq hesabına Koltonun topladığı xalların ümumi sayı 38-ə çatıb. Amma bu, Racer-in məlumatıdır, halbuki Budkovski dünən Sky Sports-a müsahibəsində bildirib ki, Kolton Hertanın cəmi bir xal toplaması qalıb. Formula 1 maşınının sükanı arxasında qət edilən hər yüz kilometrə görə amerikalı sürücü belə bir xal qazanır və Cadillac rəhbərinin sözünə inansaq, mövsümün sonuna qədər Koltonun daha bir cümə məşqində iştirak etməsi kifayətdir. Ümumilikdə ona 40 xal toplamaq lazımdır.
Əlavə etmək lazımdır ki, bu komandanın işlərini izləyən mətbuatda belə bir təəssürat yaranıb: böyük ehtimalla, Peresə gələn mövsüm üçün müqavilə təmin olunub, amma bunu Bottas barədə demək olmaz.
