Karlos Sayns: “Bu mənim doğma şəhərimdir, mən burada böyümüşəm, autosportda ilk addımlarımı burada atmışam: 10 yaşım olanda, hələ çox gənc kartinqçi ikən Formula1 sürücüsü olmağı arzulayırdım. O vaxtdan təxminən 20 il keçib, indi Formula1-də çıxış edirəm və şəhərimizdə keçiriləcək İspaniya Qran Prisinə hazırlaşıram – buna inanmaq hələ də çətindir və bununla inanılmaz dərəcədə qürur duyuram!
Əminəm ki, bu həftəsonu çoxlu zövq alacağam və hərçənd o, çox gərgin keçəcəyinə bənzəyir, xoş emosiyalar da az olmayacaq! Hələlik bu trasda yalnız yol üçün nəzərdə tutulmuş idman avtomobili ilə sürmüşəm, üstəlik həmin vaxt o, hələ tam hazır deyildi. Ümumilikdə, bu təcrübə bir neçə gün əvvəl simulyatorda vurduğum dövrələrlə müqayisədə qətiyyən reprezentativ deyildi.
Həmçinin Formula3 maşınlarının testlər zamanı bort kameraları ilə çəkilmiş videolarına baxmışam, bəzi telemetriya məlumatlarını öyrənmişəm və mümkün qədər yaxşı hazırlaşmağa çalışmışam. Baxmayaraq ki, əslində trasla həqiqi tanışlığımız yalnız sabah ilk məşq zamanı olacaq. Artıq mənə elə gəlir ki, reallıqda o, başqa cür görünür. Hər halda, bu tras adətən yarışdığımız traslardan fərqlənir.
Amma sirr deyil ki, komandamız üçün Madrinqdə çətin olacaq – bunu sadəcə halqanın konfiqurasiyasına baxaraq da proqnozlaşdırmaq mümkündür. Lakin mən bütün gücümü ortaya qoyacağam və maksimum səylə çalışmağa köklənmişəm ki, 2026-cı il daha yüksək nəticə uğrunda mübarizə aparmaq şansımın olmadığı son il kimi qalsın.
Növbəti mərhələyə Williams bir sıra texniki yeniliklər hazırlayır, bunlar əlbəttə ki, irəliləyişə kömək etməli və Bakıda xallar uğrunda mübarizə aparmaq şansımızı artırmalıdır. Amma biz realist olaraq qalırıq və etiraf edirik ki, bu yenə də kifayət deyil, biz hələ də olmaq istədiyimiz səviyyədə deyilik. Ona görə də əsas ümidlərimizi gələn illə bağlayırıq”.
Karlosdan onun üçün bu qədər vacib olan yarışa şəxsən nə qədər adam dəvət etdiyi soruşulanda, belə cavab verib: “Deyə bilərəm ki, ailəm və dostlarım üçün adıma ayrılmış tribunada 100 dəvətnamə rezerv etmişdim və onlar sözün həqiqi mənasında bir neçə günə tükəndi. Ona görə də gələn il bu tribunada daha çox yer rezerv etmək lazım olacaq.
Mən özüm də görürəm ki, hamı bu yarışı səbirsizliklə gözləyir, hamı onu izləyə, avtodromda və paddokda ola, həm də azarkeşlik edə biləcəyi üçün çox sevinir. Biz hamımız Madrinqin tikinti prosesini izləyirdik və indi, avtodrom hazır olanda, hamıya maraqlıdır ki, ortaya nə çıxıb”.
