Keçən mövsüm Brawn GP komandasının çempionatda qələbəsinin həlledici faktoru olmuş ikiqat diffuzorların dövrü uzun olmadı. Formula1 komandalarının ümumi qərarına əsasən 2011-ci ildən bu element qadağan olunacaq.
Britaniyanın Autosport saytının verdiyi məlumata görə, bu qərar dünən Formula1-in Texniki işçi qrupunun iclasında müzakirə olunub və yekdilliklə qəbul olunub. Güman edilir ki, çempionatın reqlamenti elə dəyişdiriləcək ki, faktiki olaraq ikiqat diffuzorlar qanundan kənar hesab olunacaq.
Ümumiyyətlə, belə bir qadağanı hələ Formula1-in Komissiyası və Avtoİdman üzrə Ümumdünya Şurası təsdiq etməlidirlər, amma çox güman ki, bu formal xarakter daşıyacaq. Hər halda Texniki işçi Qrupun bütün əvvəlki qərarları problemsiz təsdiq olunub…
