Bu il komandalar təqdimat mərasimlərini cürbəcür keçirirlər. Kimsə, McLaren kimi, öz maşınını klassik stildə göstərir, kimsə, Mercedes kimi, yalnız rəng çalarlarını göstərir, kimsə, Williams kimi, yeni maşını birbaşa trasa buraxır. Virgin komandası isə özünəməxsusluğu ilə seçilib - komandanın təqdimatı virtual olub, mərasimi isə komandanın titul sponsoru, həmsahibi, Virgin Group şirkətlər qrupunun başçısı Riçard Brənson açıb...


Riçard Brənson: "Əla maşın alınıb! Nik və onun əməkdaşları misilsiz iş görüblər, bu işin nəticəsi qarşımızdadır. Bu layihədə iştirak etmək, maşının hazırlanma mərhələlərini izləmək - bu qeyri-adi hisslər idi.

İndi hər şey ondan asılıdır ki, bu maşın gələn həftə Xeres testlərində nə qədər sürətli olacaq, amma bu gün biz ilk və çox vacib addımı atmışıq. Mən bizim komandaya inanıram, yaxın gələcəkdə perspektivlərinə həyəcanlanıram..."


Con But, komandanın başçısı: "Mən həmişə əmin olmuşam ki, Nik Uirt əla maşın quracaq, eyni zamanda, Nik də inanırdı ki, bizim komanda bu maşına yaxşı qulluq edə biləcək.

Son on ayda birgə işimiz zamanı mən əmin oldum ki, VR-01 dizaynerlərin intensiv və zehni əməklərinin nəticəsidir və mən çox şadam ki, bizim yeni maşın tezliklə trasa çıxacaq.

Biz əvvəldən bilirdik ki, Valensiya testlərini buraxmalı olacayıq. Lakin biz yalnız ikinci xeres testlərində debüt etməyi planlaşdırmışdıq. Amma komandanın gərgin işi sayəsində biz İspaniyaya bir həftə tez yollanırıq."


Nik Uirt, baş konstruktor: "Bu gün Virgin Racing-in bütün əməkdaşları fəxr edirlər - bütün diqqət maşına yönəlsə də, mən başçılıq etdiyim Witrh Research şirkətinin əməkdaşlarına minnətdarlıq etmək istəyirəm.

Formula1 komandasını bir araya toplamaq, mühəndis qrupunu formalaşdırmaq və ağ vərəqdən yeni maşın hazırlamaq - bizim əlimizdə olan vaxt kəsiyində çox çətin vəzifə idi. Amma biz bunun öhdəsindən gəldik. Biz CFD hidrodinamika hesablamasının tətbiqi sayəsində yeni maşın hazırlamışıq."


Virgin F1 layihəsi rəsmən keçən ilin dekabrında təqdim olunmuşdu, elə o zaman sürücülər də təsdiq olunmuşdu - Timo Qlok və Lukas di Qrassi. Amma yeni maşını indi nümayiş olundu, sabah və biri gün maşın Silverstounda ilk dövrələri vuracaq, sonra isə Xeres testlərinə yollanacaq.

Beləliklə, Virgin Racing dünya çempionatının dörd yeni komandasından real olaraq trasa maşın çıxaran ilk komanda oldu. Nik Uirt onun potensialına güvənir...

Williams komandası Valensiya testlərinə rəsmi təqdimat mərasimi keçirmədən başlayan yeganə komanda olub - bu gün səhər Rubens Barrikello yeni FW32-nin sükanı arxasına oturub və onu trasa çıxarıb.

Sistemlərin ilkin sınağı uğurlu alınıb, braziliyalı sürücünün ilk təəssüratları pozitiv olub - yeni maşın onun xoşuna gəlib, amma Rubens qeyd edib ki, adaptasiya üçün vaxt lazımdır...


Rubens Barrikello: "Bu gün mənim hər şeydən xoşum gəldi, elə bil ki, ilk dəfə birinci sinfə getmisən! İlkin testlərin göstəricilərindən nəticə çıxarmaq düzgün deyil. Bəlkə də, proqnoz verənlər də testlərin sonunu gözləyəcəklər - heç kim bilmir ki, kimin maşınında nə qədər yanacaq var. İstisna deyil ki, Bəheryndə sıralanma turuna qədər biz bunu bilməyəcəyik.

Biz maşının balansı ilə məşğuluq, maşın çox etibarlı alınıb. Ümumiyyətlə, gün pis keçmədi."


Səm Maykl, texniki direktor: "Gün məhsuldar keçdi, biz 75 dövrə vura bildik. Nəzərə alsaq ki, bütün texnika yenidir, xüsusən də Cosworth motoru, heç bir problemin yaranmaması çox xoşdur.

Sessiyanın sonunda drosseli idarə edən proqram təminatında kiçik problem yaşandı, amma bu sabah asanlıqla yoluna qoyulacaq."

Mövsümöncəsi qış testlərinin Valensiyada başlamış birinci seriyasının ilk günü Scuderia Toro Rosso komandası yeni maşınını nümayiş etdirib. Komanda çempionatda beşinci mövsümə başlayır, amma STR5 komandanın özünün hazırladığı ilk maşındır. Qısa rəsmi mərasimi komandanın başçısı Frans Tost açıb...

Frans Tost: "2010-cu il Scuderia Toro Rosso üçün vacib ildir. Reqlament tələb edir ki, biz müstəqil konstruktor olaq, ona görə də Red Bull-la dördillik əməkdaşlıqdan sonra biz ilk dəfə 100% komandanın hazırladığı maşını təqdim edirik.

Bizim üçün ən çətin vəzifə zəruri infrastrukturun yaardılması oldu, bəlkə də bu, maşın hazırlamaqdan çətindir. Biz ştatımızı 80 nəfər artırdıq, bazanın ərazisini böyütdük, istehsalı gücləndirdik, Red Bull komandasının Bisterdəki aerodinamik borusunu aldıq. Bizə bir az vaxt lazımdır ki, yüksək ixtisaslı mütəxəssislərin əməkdaşlığını maksimum effektiv sazlayaq.

İndidən mövsümdə qüvvələr nisbəti barədə fikir söyləmək mümkün deyil, amma mən hesab edirəm ki, biz çempionatı Mühəndislər Kubokunda ilk səkkizlikdə başa vura bilərik..."


STR5-in hazırlanmasında konservativ yanaşmadan istifadə olunub, amma mühəndislər STR5-in arxa hissəsini ikiqat diffuzorun ətrafında yenidən işləyiblər...

Corcio Askanelli, texniki direktor: "Keçən ilin sonunda bizim ştat 150 nəfərə çatdırıldı, indi isə komandada 200 mütəxəssis çalışır - biz artıq öz maşınımızın konstruktoruyuq.

Bizim qarşımızda ciddi vəzifə dururdu, qısa müddət ərzində sıfırdan yeni maşın hazırlamaq. Düzdür, biz bu zaman keçənilki maşın üzərində iş təcrübəmizə əsaslanmışıq. Amma yeni maşın keçənilkindən çox fərqlənir - reqlamentdəki cüzi dəyişiklər maşının konstruksiyasına ciddi müdaxilələr tələb edirdi: yanacaq bakı iki dəfə böyüdüyündən ağırlıq mərkəzi arxaya çəkilib, maşının burnu yuxarı qalxıb, qabaq təkərlər ensizləşdiyindən bu sahənin aerodinamikası tamamilə yenidən işlənib.

Biz ümid edirik ki, bu maşın hər yarışda sürücülərimizə xal qazanmaq imkanı verəcək."


Komanda bu mövsüm heyətini saxlayıb - sükan arxasına Sebastyen Buemi və Xayme Algersuari oturacaqlar. Buemi keçən il elə ilk yarışındaca xal qazanmışdı, isveçərli sürücü builki mövsümə uğurla başlamasına ümid edir...

Sebastyen Buemi: "İndi mən özümü daha inamlı hiss edirəm, Koreya və Monrealdan başqa bütün trasları tanıyıram, uik-end ərzində işimi bilirəm. Mən əvvəlki komandadayam, eyni mexaniklərlə və mühəndislərlə işləyəcəm - bu üstünlük ola bilər. İndidən bizim nə qədər rəqabətədavamlı olmamızı söyləmək çətindir, amma mən gələcəyə nikbinliklə baxıram."

Yerli vaxtla saat 16:30-da Sauber komandasının təqdimat mərasimi qurtardıqdan sonra Valensiyada Renault F1 Team komandası yeni R30 maşınını nümayiş etdirib - komanda bu maşına böyük ümidlər bəsləyir və güman edir ki, bu maşın mütəmadi olaraq podium qazanmağa imkan verəcək.

Əvvəlki mərasimdə olduğu kimi hər şey Rikardo Tormo adına avtodromun pit-leynində fotosessiya ilə başlayıb. Komanda ikinci sürücüsünü elan edib - keçən il GP2 seriyasının vitse çempionu rusiyalı Vitaliy Petrov bu mövsüm Robert Kubitsaya yoldaşlıq edəcək. Yeni maşın 80-ci illərdə Renault üçün ənənəvi olan sarı-qara rənglərə boyanıb. Komanda rəhbərliyi əsas və ehtiyat sürücülərlə yeni maşının fonunda şəkil çəkdirdikdən sonra jurnalistlərin suallarına cavab verməyə yollanıb...


Erik Buye: "Maşın əla görünür, sarı-qara rənglər hamıya Renault-nun şərəfli idman keçmişindən xəbər verir. Yadıma gəlir ki, uşaq olanda Arnu və Prostun çıxışlarını necə izləyirdim... Bu rənglər Renault-nun Formula1-ə sadiqliyini sübut edir.

Biz liderlər cərgəsinə qayıtmaq istəyirik və bunun üçün bu mövsüm mütəmadi olaraq podium qazanmağa çalışacayıq. Bunu elə birinci yarışda etmək daha yaxşı olardı, çünki biz simulyatorlarda qənaətbəxş nəticələr almışıq.

Ənstounda bazada zəruri resurslar var və biz mövsümün gedişində maşını ciddi təkmilləşdirəcəyik, ona görə də yarışdan yarışa güclənməyi qarşımıza məqsəd qoymuşuq. Bizim məqsədimiz ilk üçlüyə daxil olmaqdır."


Keçən ilin sonunda Bob Bell komandaya başçılıq etməli olmuşdu və müvəqqəti olaraq texniki direktor vəzifəsini tərk etmişdi. Amma bu mövsümü o yenidən əvvəlki vəzifəsində keçirəcək...

Bob Bell: "İndi biz keçən mövsümün startında olduğundan çox güclüyük, keçən il mövsüm başlayan kimi biz hər şeyi yenidən ağ vərəqdən başlamalı olduq. Belə bir vəziyyətdə qarşımıza məqsəd qoymaq daha asandır - biz inanırıq ki, bu il ənənəvi liderlərlə bir sırada mübarizəyə qoşula biləcəyik.

Biz bilirik ki, mövsümün gedişində maşının təkmilləşdirilməsi uğur qazanmağın həlledici amilidir. Bizim bazada bunun üçün hər cür şərait vardır, bu il biz aerodinamik borunu da yenidən qurmuşuq. Ümid edirik ki, bu mövsümü yüksək səviyyədə keçirəcəyik və gələn il titul uğrunda mübarizə aparacayıq."


Robert Kubitsa və komandanın yeni sürücüsü Vitaliy Petrov yeni maşının xarici görkəmindən razı qalıblar...

Robert kubitsa: "Əvvəlki illərin təcrübəsini nəzərə alsaq starta qədər qüvvələr nisbəti barədə fikir yürütmək çox çətindir - vəziyyət çox sürətlə dəyişir. İki il əvvəl mən BMW Sauber-də çıxış edərkən, mövsümün əvvəlində maşın biz istəyən kimi alınmamışdı, amma bir neçə ay ərzində biz bütün problemləri aradan qaldıra bildik və Bəhreyndə mən poul qazanmışdım.

Hər şey dərhal dəyişə bilər, ona görə də məqsədlər barədə danışmaq hələ tezdir. Mən ümid edirəm ki, R30-u idarə etmək asan olacaq. Mənim komanda ilə münasibətlərim əladır. Komandada atmosfer də dostcasınadır, onlar bilirlər ki, qələbə üçün nə lazımdır və mən özümü rahat hiss edirəm!"


Vitaliy Petrov: "Mənim üçün bu qış olduqca uzun alındı, gördükcə ki, vakansiyalar bir-bir dolur mən həyəcanlanırdım, amma həmişə inanırdım ki, nə vaxtsa mənim də növbəm çatacaq. Renault F1 Team komandasının sayəsində mənim arzum reallıq oldu.

Mən burada olmağımla fəxr edirəm və öz işimi ən yüksək səviyyədə görməyə çalışacam. Testlər sabah başlayacaq, onda biz başa düşəcəyik ki, R30 digər maşınlarla müqayisədə nə qədər sürətlidir. Çempionatda isə Robertə yaxın olmağa çalışacam və ümid edirəm ki, hər yarışda komandaya xal qazandıracam."

Bu gün yerli vaxtla saat 14:30-da BMW Sauber F1 Team komandası 2010-ci il mövsümü üçün hazırladığı yeni maşınını təqdim edib. Mərasim Rikardo Tormo adına Valensiya avtodromunun pit-leynində fotosessiya ilə başlayıb, Pedro de la Rosa və Kamui Kobayaşi pərdəni çəkiblər və jurnalistlər üzərinə heç bir sponsor loqotipi yapşdırılmamış yeni maşını görüblər - komanda təqdimat mərasiminə qədər yalnız İsveçrənin Certina şirkəti ilə müqavilə bağlaya bilib...


Peter Zauber: "Son aylar biz gərgin tempdə işləmişik. Əvvəlcə biz komandanın yaşaması üçün mübarizə aparmalı olduq, sonra isə bütün qüvvəmizi komandanın gələcəyinin təmin olunmasına yönəltdik. Amma yeni maşının texniki hazırlığı fasiləsiz davam edirdi qrafik üzrə, heç bir çətinliyə baxmadan.

Komandanın çoxdankı ənənəsi var - biz həmişə istedadlı debtüantı və təcrübəli sürücünü dəvət edirik - bu yolla həmişə uğur qazanmışıq. Pedro uzun illər top-komandada ən yüksək texniki səviyyədə çalışıb, gənc və perspektivli Kamui isə keçən il iki çıxışı ilə hamıda əla təəssürat oyadıb."


Villi Rampf: "Yeni C29-un üzərində işləyərkən, komanda keçənilki təcrübəsinə və mövsümün gedişindkəki inkişafına əsaslanıb. Amma yanacaqdoldurmaya qadağa və qabaq təkərlərin ensiz olması maşının layihəsində ciddi dəyişikliklər tələb etdi."


Pedro de la Rosa: "Həhayət, mən yenə də özümü tam sürücü hesab edə bilərəm. Mən trasdakı mübarizə üçün çox darıxmışdım. Eyni zamanda bu illər ərzində mən texniki məsələlərdə çox şey öyrənmişəm - indi bütün biliklərimlə komanda ilə bölüşmək istəyirəm."

Kamui Kobayaşi: "Mən fəxr edirəm ki, Peter Zauber mənə inanıb və mən onu məyus etməməyə çalışacam. Mənim məqsədim budur ki, mövsümün sonunda o yenə də mənimlə fəxr etsin."

Bu gün yerli vaxtla saat 11:00-da Vodafone McLaren Mercedes komandası Vodafone-nin Nyuberidə Britaniya şöbəsinin mənzil qərargahında yeni maşınını nümayiş etdirib. Eyni zamanda komandanın rəsmi saytında təqdimat mərasimi canlı olaraq yayımlanıb və yayım zamanı heç bir texniki problemlər yaşanmayıb. Mərasimi komandanın başçısı Martin Uitmarş açıb, o Mercedes Motorsport-un vitse prezidenti Norbet Hauqun müəyyən səbəblər üzündən mərasimdə iştirak etməməsindən təəssüflənib və komandanın qarşısında duran vəzifələrdən danışıb...


Martin Uitmarş: "Hər il Formula1-də biz texniki reqlamentdəki dəyişikliklərlə əlaqədar olaraq yeni çağırış qəbul edirik, 2010-cu il də istisna deyil. Bu dəfə biz ilk andan ikiqat diffuzor konsepsiyası olan maşının üzərində işləmişik. Yanacqdoldurmaya qadağa ona gətirib çıxarıb ki, yanacaq bakı iki dəfə böyüyüb, eyni zamanda təkərlərə, asılqanlara və ümumiyyətlə, şassiyə yüklənmələr də iki dəfə artıb.

Qabaq təkərlərin eninin azaldılması isə konstruktorlar qarşısında yeni vəzifələr qoyub, həmçinin, sürücülər qarşısında da. Censon Batton sonuncu dünya çempionudur, o yeni qələbələr arzu edir, eyni azrularla ondan əvvəlki dünya çempionu - Lyuis Həmilton yaşayır. Bizim müasir Formula1-də ən güclü sürücü cütlüyümüz var və komandanın sürücüləri birlikdə işləməyə hazırdırlar. Bizim məqsədimiz aydındır - biz qələbə arzulayırıq."

Yeni McLaren MP4-25 ənənəvi rəng çalarlarına boyansa da, ənənəvi görünüşə malik deyil - reqlamentlə əlaqədar olaraq maşının ölçüləri dəyişib, aerodinamika tam yenilənib, bir çox yeni elementlər əlavə olunub...


Pəddi Lou, texniki direktor: "Bu çox çətin və eleqant maşındır, maşın aerodinamika və mexanika şöbələrinin mütəxəssislərinin çox sıx əməkdaşlığı nəticəsində əmələ gəlib.

Maşının hazırlığı ilə məşğul olan kollektiv qarşısında çətin vəzifə qoyulmuşdu, axı indi komandada bir deyil, iki dünya çempionu çıxış edəcək. Biz Censon və Lyuisə elə bir maşın vermək istədik ki, onlar öz işlərinin öhdəsindən asanlıqla gələ bilsinlər. Məncə, biz buna nail olmuşuq."

Tim Qoss, baş mühəndis: "FİA-nın keçən ilin əvvəllərində elan etdiyi təlimata əsasən biz maşının altlığı və ikiqat diffuzor üzərində işləri tamamilə yenidən başladıq. Axı 2010-cu ildə məhz bu elementlər yarışda ciddi üstünlük yaradacaq. Ona görə də biz MP4-25-in arxa hissəsini də tam dəyişdik. Maşın keçənilkindən uzundur, çünki yanacaq bakı iki dəfə böyüyüb, bununla şassi və maşının korpusu da aşağı düşüb. KERS-dən imtina nəticəsində daxili yerləşdirmədə və çəki paylanmasında da ciddi dəyişikliklər etmişik. Aerodinamik dəyişikliklər isə nəzərəçarpacaq dərəcədədir.

Motorun üzərində əlavə hava kanalı qoyulub və bu tədricən maşının arxa antiqanadına keçir, belə bir element maşının arxa hissəsinin asfalta yatma qüvvəsinin səviyyəsini maksimum təmin edəcək. Buna oxşar elementdən biz keçən il Monakoda istifadə etmişdik, bu elementlər çox sadə və effektivdirlər."

Mərasim başlanandan 10 dəqiqə sonra Censon Batton və Lyuis Həmilton yeni maşının üzərindən ağ pərdəni çəkiblər və jurnalistlər ilk dəfə MP4-25-i görüblər...


Censon Batton: "Mən burda iştirakımla fəxr edirəm və bilirəm ki, bir il burnuna bir yazılmış maşının sükanı arxasında oturacam: bu ciddi məsuliyyət və böyük şərəfdir. Testlərin ilk günündən mən komanda ilə işləyəcəm, maşını öyrənəcəm, onu ilk yarışa hazırlayacam. Mən bir neçə dəfə demişəm: mövsümdə üstünlüyü o komanda qazanacaq ki, testlərin gedişində onu ən tez təkmilləşdirsin.

Yeni maşın əla görünür. Keçən ilin startı komanda üçün yaxşı alınmamışdı, bu, komandanı yeni qəhrəmanlıqlara ruhlandırıb, komanda bu mövsümdə uğur qazanmağa çalışacaq. Bazanın əməkdaşları deyirlər ki, bu qış onların yadlarına gələn ən gərgin dövr olub. Mən tezliklə maşının sükanı arxasında trasa çıxmaq istəyirəm."

Lyuis Həmilton: "Keçənilki maşınla fərq çoxdur və mən fəxr edirəm ki, yeni maşının hazırlanmasında mənim də əməyim var. Əminəm ki, trasda da maşın keçənilkindən fərqli olacaq.

Biz MP4-25-in üzərində çox işləmişik, əməkdaşlarımız tam çalışıblar, onlar maşının asfalta yatma qüvvəsini və aerodinamik effektliyi maksimum səviyyəyə çatdırıblar. Mən bilirəm ki, bu maşın nə qədər yuxusuz gecələrin hesabına başa gəlib, amma son yekunda əla maşın alınıb.

Əlbəttə, həm mən, həm də Censon bu maşının sükanı arxasında ancaq qələbə uğrunda mübarizə aparacayıq, biz bunu başa düşürük. Aydındır ki, hər ikimiz də çempion olmaq istəyirik - bu bizim məqsədimizdir, amma bizim hər ikimiz komandaya Mühəndislər Kubokunu qazandırmağa çalışacayıq. Əminəm ki, bizi əla mövsüm gözləyir!"

Ferrari-nin Maranelloda təşkil etdiyi 2010-cu il maşınının təqdimat mərasimi çox təmtəraqlı keçib - mərasimdə iştirak edənlər müəyyən bir müddətə iqtisadi böhranı, Formula1-in yönəldiyi məsrəflərin azaldılması istiqamətini və digər çətinlikləri unudublar. Amma belə bir mərasimə səbəb var idi: indi Skuderiyada ikiqat dünya çempionu Fernando Alonso çıxış edəcək, yeni maşının hazırlanmasına isə Ferrari mühəndisləri keçən ilin yayından başlamışdılar - hamı ümid edir ki, yeni maşın keçən ilin uğursuzluqlarını unutduracaq.


Stefano Domenikali: "Bu çempionat bizim üçün çox vacib olacaq. Keçənilki mövsüm müəyyən səbəblər üzündən bizim üçün uğursuz oldu, amma 2010-cu ildə biz rəqabətədavamlı olmalıyıq - Ferrari buna layiqdir...

Bizim iki yeni sürücümüz var - niyə mən "iki yeni" dedim? Fernando Alonso ikiqat dünya çempionudur və biz əminik ki, o üçüncü titulu qazanacaq. O artıq Formula1-in məşhur çempionlarındandır, indi isə həm onun üçün, həm də bizim üçün həlledici andır: o da uğur qazanmaq istəyir, biz də...

Və biz yeni Felipedən danışırıq: belə bir dramatik çempionatdan sonra, Hunqarorinqdə dəhşətli qəzadan sonra, Felipe yeni start almaq və Macarıstanda kəsilmiş yolu davam etdirmək istəyir.

Mən hər iki sürücüyə uğur arzulayıram!"

Nəzəri cəhətdən mərasimi canlı olaraq internetdən də izləmək olardı, düzdür, mərasimə maraq o qədər böyük idi ki, hətta Ferrari-nin mətbuat xidməti də etiraf edib ki, komandanın saytı azarkeşlərin külli axını altında "donub" - ziyarətçilərin sayı 3 milyonu keçibmiş...


Luka di Montedzemolo: "Bizim maşın qırmızı, sarı və ağ rənglərə boyanıb. Sarı - təkcə Shell-in rəngi deyil, bu, hər şeydən əvvəl Modena şəhərinin rəngidir. Ağ - Santander-in rəngidir. Mən burada olan İspaniya bankının nümayəndələrinə öz təşəkkürümü bildirmək istəyirəm. Biz uğurlu əməkdaşlığa ümid edirik.

Mən hər iki sürücümüzə inanıram. Felipe qəzadan sonra daha güclü olub. Budapeştdə hospitalda ona baş çəkəndən sonra, mən demişdim ki, bundan sonra onun sürəti daha da artacaq. Mən haqlı oldum. Fernando Alonso isə ikiqat dünya çempionudur və 2005-ci və 2006-cı illərdə bizdən üstün olub. Biz şadıq ki, o indi Ferrari-də çıxış edir. Onun karyerasında vacib məqamdır. Biz hər iki sürücüdən çox şey gözləyirik.

Bundan başqa, mənə xoşdur ki, biz Maranelloda istedadlı milli mühəndislər yetişdiririk. Bu, yalnız komanda deyil, bu, həm də ailədir. Stefano Domenikali çox gəncdir, Luka Marmorini bizə qayıdıb və motorlar şöbəsinə başçılıq edir. Nikolas Tombasisi isə mən yarımitaliyalı hesab edirəm! Aldo Kosta - bizim maşınların xaç atasıdır."

Bundan sonra komandanın əsas sürücüləri Fernando Alonso və Felipe Massa gələcək mübarizədən danışıblar...


Fernando Alonso: "Mən və Felipenin indi qarşısımızda duran başlıca vəzifə fevral testlərində məsuliyyətlə işləməkdir, bunun sayəsində Skuderiya mövsümün ilk yarışına inamla çıxa bilər. Bizim komandamız qısa müddət ərzində maşın üçün ən yaxşı sazlanmaları seçə bilər. Texniki işçilərin və mexaniklərin işi, aerodinamik borunun nəticələri, asılqanların və motorun xarakteristikaları - bütün bunlar bizim əminliyimizi möhkəmləndirir. Testlərin nəticələri isə daha da gücləndirəcək.

Biz Felipe ilə çalışacayıq ki, qırmızı maşınlar həmişə öndə olsunlar. Biz 100% çalışmaq fikrindəyik. Mənim həmişə güclü komanda yoldaşlarım olub, onlarla heç bir problem olmayıb, onlarla münasibətlərim əla olub və Felipe ilə də eyni olacaq."

Felipe Massa: "Mən Alonso dedikləri ilə razıyam. Onun özünə gəlincə, mən çoxdan belə bir komanda yoldaşı gözləyirdim. Ferrari-yə yeni sürücü gələndə, ümidlər həmişə yüksək olur və bizim məqsədimiz vahid komanda kimi rəqabətədavamlı olmaqdır. Mənim çox güclü komanda yoldaşım olacaq, amma mən həmişə öz işimi əla yerinə yetirmişəm, çox şey öyrənmişəm və bir neçə dəfə sübut etmişəm ki, istənilən komanda yoldaşımla mübarizə apara və qalib gələ bilərəm."

Yeni maşın barədə texniki direktor Aldo Kosta, motorlar şöbəsinin başçısı Luka Marmorini və baş konstruktor Nikolas Tombasis danışıblar...


Aldo Kosta: "F10 Formula1-də Ferrari-nin hazırladığı 56-cı maşındır. Bu komandanın bütün üzvlərinin birgə məhsuludur. Maşın üzərində ilk işlər keçən ilin yazında başlanmışdı, yayda isə bu işlər daha da intensivləşdi. Bu zaman biz əvvəlki şassi ilə iş zamanı toplanmış təcrübədən aktiv istifadə edirdik.

Reqlamentdə dəyişikliklər elə ciddi olmasa da konstruktiv dəyişikliklərə səbəb oldu. İkiqat diffuzorların leqallaşdırılması keçənilki maşının arxa hissəsini ağ vərəqdən başlayaraq dəyişməyə gətirib çıxardı. Bu ildən yanacqdoldurma qadağan olunacaq, ona görə də yanacaq bakı iki dəfə böyüdülüb. Bu ildən maşınlarda KERS də olmayacaq, qabaq təkərlər daha ensiz olacaq, maşının minimal çəkisi artırılıb, təklükəsizlik tələbləri sərtləşdirilib, bəzi materiallar qadağan olunub.

Yeni maşın gələn həftədən başlayan testlərin gedişində təkmilləşə bilər, ona görə də Bəhreyn Qran Prisində o artıq başqa cür görünəcək. Biz F10-u mövsümün gedişində modernizə etməyi nəzərdə tutmuşuq. Biz əminik ki, keçən illə müqayisədə güclü inkişaf etimişik, amma maşının real rəqabətədavamlılığı mövsümün əvvəlində bilinəcək."

Luka Marmorini: "2010-cu ildə yanacaq sərfiyyatı vacib rol oynayacaq. Bizim Shell-dən olan tərəfdaşalrımızla birlikdə bu istiqamətdə irəliyə doğru böyük addım atmışıq. Düzdür, motorların təkmilləşdirilməsi qadağandır və biz onun konstruksiyasını dəyişə bilmirik. Amma onun xarakteristikalarını müəyyən yollarla dəyişmək mümkündür. Məsələn, F10-da biz buraxılış sistemini ciddi yeniləmişik.

Bu il KERS olmayacaq, ona görə də bir çox əlavə detallardan azad olmuşuq. İstifadə etdiyimiz materialları və texnologiyaları ciddi araşdırdıq, bununla motor istehsalının dəyərini azaltdıq. Shell-lə birlikdə biz optimal sürtkü və yanacaqdan istifadə etməklə motorun gücünün artırılmasına nail olduq.

Bütün bunlar F10-a mövsümdə qələbə qazanmağa imkan verəcək. Eyni zamanda biz etibarlılığı da unutmamışıq."

Nikolas Tombasis: "Bizim başlıca vəzifəmiz ikiqat diffuzordan effektiv istifadə etmək idi. Bu elementin maksimum effektiv işləməsi üçün biz motorun, ötürmələr qutusunun və hidravlik sistemin yerləşməsini optimallaşdırdıq. Ötürmələr qutusunu ensizləşdirmişik, arxa asılqanların konstruksiyası da dəyişib.

Maşının ön hissəsində də ciddi dəyişikliklər var. Şassi daha hündür olub, bununla hava axınının keyfiyyətini yüksəltmişik. Təkər qapaqları qadağan olunduğundan burun elementinin köməyi ilə asfalta yatma qüvvəsinin səviyyəsini qaldırmışıq.

Aydındır ki, yanacaq bakı iki dəfə böyüyüb, onun konstruksiyası da dəyişib. Baka görə şassinin uzunluğu da artıb. Soyutma sistemi də görünüşünü dəyişib - indi daha uzun və dardır. Aerodinamikada da dəyişikliklər var - görünməsələr də çox vacibdirlər. Aerodinamika müasir Formula1 maşınının vacib hissəsi olsa da, biz mexanikanı unutmamışıq. Keçən illə müqayisədə bütün detallar yenidən hazırlanıb."

2010-cu il mövsümü Mercedes GP komandasının Ştutqartda təqdimat mərasimi ilə başlayıb, amma bu yeni maşının ənənəvi təqdimatı deyildi, bu dəfə Mercedes-in muzeyinə toplaşanlar keçənilki Brawn GP maşınının üzərinə vurulmuş rəng çaları ilə və komandanın yeni sürücüləri ilə tanış olublar.

MGP W01 üzərində iş hələ davam edir, yeni şassi fevralın 1-də Valensiyada debüt edəcək, həm də ən maraqlı detalları komanda testlərin son seriyasına saxlayacaq, Ştutqartda isə jurnalistlər komandanın qarşıdakı mövsümdə planlarını eşidiblər.


Mercedes-in dizayner mərkəzinin mütəxəssisləri rəng çalarında tarixi və müasirliyi sintez etməyə çalışıblar. Təqdimatda 1934-cü ildə baş vermiş əfsanəvi hadisə xatırlanıb - o zaman Mercedes W25 maşınının çəkisini azaltmaq üçün onun üzərindən boyanı qaşımışdılar - həmin yarışın xatirəsinə MGP W01-in korpusunda Mercedes loqotiplərinin altında rənqlənməmiş karbon sahələr saxlanılıb.

Tədbir irimiqyaslı alınıb, Mercedes-in muzeyinə 600-dən çox qonaq çağırılmışdı - jurnalistlər, fotoqraflar, Mercedes-Benz-in və Brawn GP-nin əməkdaşları. Mərasimi giriş sözü ilə Daimler AG konserninin icraçı direktoru və Mercedes-Benz Cars-ın başçısı Diter Tsetşe açıb...


Diter Tsetşe: "Almaniyada dünya şöhrətli ulduz elə də çox deyil, amma onlardan ikisi bu gün burdadır: Mixael Şumaher və Mercedes-Benz. Mixael özünün ilk məhəbbətinə qayıdır! Əgər komanda bu il titul qazanmasa, qorxulu heç nə baş verməyəcək - bizə bir qədər vaxt verin, bu baş verənə qədər mən sağ qalacam."

Keçən il Ross Braun bir daha sübut etdi ki, möcüzələr yaratmağa qadirdir - gələcəyi naməlum olan komanda çempionatda qalib gəldi və bir çox avtoistehsalçıların Formula1-i tərk etdiyi bir vaxtda Mercedes-in dəstəyini qazandı. Bəhreyndə, mövsümün ilk yarışında Ross yenə də yeni komandaya başçılıq edəcək, amma məqsədlər yenə də ən ciddidir...


Ross Braun: "Ştuqartda Mercedes-in muzeyində Mercedes GP komandasının təqdimatında iştirak etmək böyük şərəfdir - muzeyin eksponatları şirkətin fantastik yarış ənənələrindən xəbər verir. Biz də bu tarixə adımızı yazmağa çalışacayıq.

Keçən il və bu qış komanda MGP W01 üzərində gərgin işləyib, biz hamımız gələn həftə başlayacaq Valensiya testlərini səbirsizliklə gözləyirik. Bizim iki əla sürücümüz var - Niko və Mixael, çempionatın ən güclü cütlüklərindən biri. Mercedes-Benz-lə, Aabar-la, bizim yeni titul sponsorumuz Petronas-la və komandanın digər tərəfdaşları ilə birlikdə səbirsizliklə mövsümün başlanmasını gözləyirik."

Mercedes Motorsport-un vitse prezidenti Norbert Hauq zavod komandasının qəbul etdiyi çağırışın miqyasından danışıb...

Norbert Hauq: "Mercedes GP Petronas komandasının bugünkü təqdimatı ilə Mercedes-in idman şöbəsinin yüzillik tarixində yeni era başlayır. Qarşıdakı mövsümdə biz Formula1-in 60 illik tarixində ən ciddi çağırışın şahidi olacayıq.

Biz sürücülərimizlə işin başlanmasını səbirsizliklə gözləyirik - istedadlı və perspektivli Niko Rosberq və yeddiqat dünya çempionu Mixael Şumaher. Mən, həmçinin, titul sponsorumuz Petronas şirkətini, həmsərmayədar Aabar/İPİC şirkətini, bütün tərəfdaşlarımızı və Ross Braun və Nik Fray başda olmaqla Brawn GP komandasının bütün əməkdaşlarını Mercedes ailəsində salamlamağa şadam. Biz hamımız bu çağırışa bütün gücümüzlə, stabilliklə və sözsüz motivasiya ilə cavab verəcəyik."

Keçən mövsüm başa çatdıqdan sonra Brawn GP komandası dünya çempionunu itirib, Censon Batton McLaren-ə keçib, amma komanda mümkün olmayan iş görüb və Mixael Şumaheri yarışlara qaytarıb və bu xəbər azarkeşlərin və mətbuatın böyük diqqətinə səbəb olub. Ross Braun maşın qurmağı bacarır, Mixael isə onlarla qalib gəlməyi bacarır və 2010-cu ildə əfsanəvi cütlük yenə də birgə işləyəcək...


Mixael Şumaher: "Faktiki olaraq bu gün 2010-cu ilin çempionatı start alır və mən bütün diqqətimi yeni çağırışa yönəltmişəm. Mənim üçün bu mövsüm təkrar starta bənzəyir, mən yenidən mübarizəyə köklənmişəm. Mercedes GP Petronas - çempion komandasıdır və mən Valensiyada yeni maşının sükanı arxasına oturmağa tələsirəm.

Mən əminəm ki, yeni komanda qələbələr uğrunda mübarizə apara biləcək və sözsüz ki, mən bunun üçün bütün gücümü sərf edəcəm. Mercedes-Benz-in tərkibində işimi bir növ dövrənin qapanması kimi başa düşürəm: karyeramın əvvəlində də mənim şlemimdə üçşüalı ulduz var idi."

Williams komandasında keçirdiyi dörd il ərzində Niko Rosberq bir qələbə belə qazana bilməyib. Mercedes GP Petronas komandası ilə müqavilə bağlamaqla 24 yaşlı alman sürücü vəziyyəti dəyişməyə ümid edir...

Niko Rosberq: "Burda, Mercedes-in muzeyində bu markanın yarış traslarındakı keçmiş uğurlarını hiss etmək mümkündür. Mən fəxr edirəm ki, mən "gümüşü oxlar"ın bir hissəsiyəm.

Noyabrda komanda ilə müqavilə bağlayandan sonra mən Brəklidəki bazada, Briksuortda Mercedes-Benz High Performance Engines zavodunda və burda oldum, əməkdaşlarla ünsiyyət qurdum və tanış oldum. Mən gördüm ki, komanda yeni maşın üzərində gərgin işləyir və səbirsizliklə yeni maşını trasa çıxarmağı gözləyirəm."

Gözlənildiyi kimi fevral testləri ərəfəsində Scuderia Toro Rosso komandası rəsmən təsdiq edib ki, Sebastyen Bueminin 2010-cu ildə komanda yoldaşı ispaniyalı sürücü Xayme Algersuari olacaq. Komandanın mətbuat xidməti bu münasibətlə reliz yayıb...

Frans Tost: "Xaymenin keçən ilin ortalarında, Macarıstan Qran Prisində, ilkin testlərdə iştirakı olmadan debüt etməsini nəzərə alsaq demək olar ki, o işinin öhdəsindən pis gəlmədi - mövsümün ikinci yarısında o stabil olaraq inkişaf edirdi. Cəmi 19 yaşı olmasına baxmayaraq, yarışlara çox ciddi hazırlaşırdı. 2010-cu ildə Xayme hələ öyrənməyi davam edəcək, çünki mövsümün birinci yarısındakı traslar ona tanış deyil.

Algersuari ilə müqavilənin bağlanması bir daha göstərir ki, biz əvvəlki kimi Red Bull-un gənclər proqramının yetişdirmələri ilə işləməyə hazırıq."

Beləliklə, Toro Rosso komandası əvvəlki heyətini tam saxlayıb və komandanın maşınlarını starta Sebastyen Buemi və Xayme Algersuari çıxaracaqlar...

Pedro de la Rosa yarışlara qayıdır: keçmiş BMW Sauber komandası bu gün səhər təcrübəli ispan sürücü ilə 2010-cu il üçün müqavilə bağlamasını elan edib. De la Rosa yeddi il McLaren-də ehtiyat və test sürücü kimi çalışıb, indi o İsveçrə komandasında gənc Kamui Kobyaşiyə yoldaşlıq edəcək...

Peter Zauber: "Pedro uzun illərdir ki, ən yüksək texniki səviyyəsi olan komandada çalışır. Onun təcrübəsi bizim kollektiv üçün və əlbəttə, Kamui üçün faydalı olacaq. Tarixə baxsaq görərik ki, bir çox hallarda təcrübəli peşəkar sürücünün böyük ümidlər bəslənən gənc sürücü ilə ittifaqı yaxşı nəticələr verir. Məncə, 2010-cu ildə biz onların hər ikisindən razı qalacayıq."

Sonuncu dəfə de la Rosa 2006-cı ilin ikinci yarısında McLaren-i tərk etmiş Xuan Pablo Mantoyyanı əvəz edərkən Qran Pri startına çıxıb...

Pedro de la Rosa: "Mən mövsümün başlanmasını səbirsizliklə gözləyirəm - mən Peter Zauberin komandasında yarışacam, bu insan 1993-cü ildən Formula1-də böyük çəhrət qazanıb..."