F-1.az xatırladır ki, Sauber komandası uzun illər tərəfdaşlıq etdiyi Ferrari-dən ayrılmaq qərarına gəlmiş və Honda ilə müqavilə bağlamışdı. Lakin Monişa Kaltenbornun istefa verməsi ilə bu müqavilə qüvvədən düşdü və tərəflər dünən bu anlaşmanı tamamilə ləğv ediblər. Lakin isveçrəlilər bu xəbərdən bir gün sonra italyanlarla müqavilə bağladıqlarını ictimaiyyətə bildiriblər. Beləliklə, Sauber gələn il Ferrari-nin yeni mühərriyindən istifadə edəcək.
Frederik Vassyör: “Ferrari ilə çoxillik müqavilə bağladıq və onlarla işləyəcəyimiz üçün sevincliyik. Sauber komandası ilə Ferrari arasındakı təcrübə bizim uğurlu gələcəyimizin təməlidir. Bu hal bizim 2018-ci il bolidinin inkişafına kömək edir”.
Ferrari ilə müqavilədən sonra Antonio Covinatsi və Şarl Leklerin Sauber-də yarışmaq üçün fürsətləri yarana bilər. Vassyör də daha əvvəl verdiyi açıqlamada bildirmişdi ki, mühərriklə bağlı müqavilədə bu cür hallar ola bilər.
