26 yaşlı hollandiyalı sürücü Qyedo van der Qarde Caterham komandası ilə 2012-ci il mövsümündə ehtiyat sürücü müqaviləsi imzalayıb.
2008-ci ildə Renault Dünya Seriyasında titul qazanan Qyedo növbəti üç ili GP2 seriyasında keçirib və cəmi üç qələbə ilə yadda qalıb. Hollandiyalı sürücü bir neçə dəfə Formula1 testlərinə cəlb olunub – 2007-ci ildə Super Aguri və Spyker-də, 2008-ci ildə Force İndia-da və 2009-cu ildə Renault-da gücünü sınasa da, müqavilə bağlaya bilməmişdi.
Dünənə qədər van der Qarde Hispania komandasına əsas namizədlərdən biri idi, amma komanda Narain Kartikeyanla müqavilə imzaladıqdan sonra Qyedonun seçimi qalmayıb – qayınatası milyarder Marsel Bukhorna məxsus McGregor şirkətinin sponsor dəstəyilə Caterham-lə razılaşma əldə olunub.
Yeni komandada Qyedo mövsümöncəsi testlərin bir günündə və mövsümün gedişində cümə srəbəst yürüşlərinin bəzisində trasa çıxacaq…
Qyedo van der Qarde: “Caterham yeni komandadır, komandada fantastik insanlar çalışır. Toni Fernandes çox səmimi adamdır, komandanın gələcəkdə uğur qazanması üçün əlindən gələni edir. Mən komanda ilə birlikdə öyrənəcəm və inkişaf etməyə ümidliyəm.”
