Sabah FİA dünya çempionatı iştirakçılarının rəsmi siyahısını dərc etməlidir və bununla da federasiya bütün suallara cavab verəcək. Hələlik Campos və Sauber komandalarının hansı adla starta çıxması məlum deyil, bundan başqa Serbiyanın Stefan GP komandasının, ümümiyyətlə, starta çıxıb-çıxmaması məsələsi hamını maraqlandırır.

Britaniyanın Autosport saytı məlumatlı mənbələrə istinadən xəbər yayıb ki, Amerikanın US F1 komandası faktiki olaraq bağlanıb. Bu barədə hələ heç bir rəısmi bəyanat verilməyib, amma bu gün komandanın əməkdaşlarını istehsal şöbəsinin rəisi Deyv Skoq toplayaraq bildirib ki, personal haqqı ödənilməyən məzuniyyətə göndərilir, amma faktiki olaraq müqvilələr hələ qüvvədədir.

Mercedes GP komandasının sürücüləri Mixael Şumaher və Niko Rosberq bu gün Cenevrə avtosalonunda Formula1-in yeni Təhlükəsizlik Maşınını (TM) təqdim ediblər. Mercedes-Benz SLS AMG 2008-ci ildən istifadə olunan SL63 AMG modelini əvəz edəcək. Avtosalonun podiumuna maşını Niko Rosberq çıxarıb, SLS-in reklam kampaniyasnda iştirak etmiş Mixael Şumaher isə jurnalistlərə bildirib ki, belə bir maşını artıq özü üçün sifariş edib.

Xose Mariya Lopes US F1 komandası ilə müqavilə bağlamışdı, amma bu komanda çox güman ki, çempionatda iştirak edə bilməyəcək və sürücünün menecmenti Campos-un rəhbərliyi ilə ehtiyat sürücü vakansiyası üzrə danışıqlar aparır. İtaliyanın Dallara şirkətində mövsümün ilk yarışına hazırlanan maşının sükanı arxasında Bruno Senna və Karun Çandhok oturacaqlar, Xose Mariya isə komandanın ehtiyat sürücüsü ola bilər...

Uşaq vaxtlarından Lyuis Həmiltonun meneceri atası Əntoni olub, amma Britaniyanın Autosport saytına müsahibəsində sürücü bildirib ki, valideyni ilə işgüzar əməkdaşlığını davam etdirməyəcək - münasibətlər əvvəlki kimi qalacaq, amma Əntoni Həmilton gənc sürücülərin hazırlığı proqramı üzərində işləməyi planlaşdırır, Lyuis isə özünə yeni menecer axtaracaq.

Biz artıq yazmışdıq ki, Bəhreyn Qran Prisinin təşkilatçıları çempionatın 60 yaşını qeyd etmək üçün hazırda sağ olan bütün Formula1 çempionlarını bir araya toplamağı qərara alıblar. Gulf Daily News qəzetinin son xəbərinə görə, 20 çempiondan on səkkizi öz razılığını bildirib - yalnız Nelson Pike və Kimi Rəykkönen Bəhreynə gəlməkdən imtina ediblər.