Barselona, 12 mart

Səhər testlər sıx duman üzündən bir saatlığa təxirə salınıb. Tibb helikopteri lazım olan anda səmaya qalxa bilmədiyindən tras bağlanıb. Amma sonradan duman çəkilib və sürücülər yaxşı havada işləyiblər. Rubens Barrikello Barselona testlərinin son günü protokollara başçılıq edib, braziliyalı sürücü həftənin rekorduna imza atıb, Brawn GP-nin yeni maşını çox sürətli alınıb, maraqlıdır ki, görəsən BGP01 Melburnda da belə sürətli olacaq?

İkinci yeri Niko Rosberq tutub. İlk iki sürücüdən başqa hamı səksən saniyəlik həddi aşa bilməyiblər. Timo Qlok isə üçüncü olub.

Sebastyan Fettel Fernando Alonsonu 0.1 saniyə qabaqlamaqla dördüncü olub. İspan sürücü öz növbəsində Felipe Massanı cəmi 0.01 saniyə qabaqlayıb. Bu gün Ferrari maşını mövsümün ilk yarışına sazlamaqla məşğul olub - gələn dəfə F60 trasa artıq Melburnda çıxacaq.

Robert Kubitsa yeddinci olub, polşalı sürücü yarışı imitasiya edib, nahardan sonra isə maşını mövsümün ilk yarışına sazlayıb. Kubitsa 134 dövrə vurub, dörd gün ərzində isə BMW Sauber F1.09 Barselonada 2162 km məsafə qət edib.

Lyuis Həmilton səkkizinci olub, cəmi 70 dövrə vurub və günün liderinə iki saniyə uduzub. Gələn həftə komanda Xeres testlərində işləyəcək.

Sebastyen Buemi səhər trasda işləyib və doqquzuncu olub, Sebastyen Burde isə nahardan sonra sükan arxasına oturub və on birinci olub. Toro Rosso sürücülərini Cankarlo Fizikella ayırıb.

Nəticələr belə olub:

Pilot	Komanda	Motor	Vaxt	Dövrə
1. R.Barrikello	Brawn GP	Mercedes	1:18.926	110
2. N.Rosberq	Williams	Toyota	+ 0:00.848	120
3. T.Qlok	Toyota	Toyota	+ 0:01.165	128
4. S.Fettel	Red Bull	Renault	+ 0:01.650	83
5. F.Alonso	Renault	Renault	+ 0:01.738	64
6. F.Massa	Ferrari	Ferrari	+ 0:01.751	92
7. R.Kubitsa	BMW Sauber	BMW	+ 0:01.814	134
8. L.Həmilton	McLaren	Mercedes	+ 0:01.943	70
9. S.Buemi	Toro Rosso	Ferrari	+ 0:02.087	62
10. C.Fizikella	Force İndia	Mercedes	+ 0:02.119	141
11. S.Burde	Toro Rosso	Ferrari	+ 0:02.703	27