Bir qədər əvvəl Ştutqartda Mercedes Museum-də təqdimat mərasimi başlayıb: KİV nümayəndələri, şirkətin əməkdaşları və çoxsaylı qonaqlarla dolu olan zala sürücülər daxil olublar – Mixael Şumaher və Niko Rosberq.
Yeni Mercedes GP MGP W01 şassisi gələn həftə testlərdə peyda olacaq, bu gün isə qonaqlar yeni maşının rəng çalarını görüblər – açıq-gümüşü fonda komandanın titul sponsorunun, Malayziyanın Petronas neft şirkətinin loqotipləri vurulub.
Mixael Şumaherin Formula1-ə qayıdışını alqışlayan Daimler konserninin başçısı Diter Tsetşe deyib: “Almaniyada dünya şöhrətli ulduz elə də çox deyil, amma onlardan ikisi bu gün burdadır: Mixael Şumaher və Mercedes-Benz. Mixael özünün ilk məhəbbətinə qayıdır!”
Mixael Şumaher isə əlavə edib: “Məncə, burda yalnız ulduzlar toplaşıblar: Ross Braun, onun çempion komandası, Mercedes-in təcrübə və bilikləri və müasir Formula1-in ən yaxşı motoru, ona görə də bizim məqsədimiz aydındır: biz çempion titulu qazanmaq istəyirik. Biz onun uğrunda elə ilk startdan mübarizə aparacayıq.”
Ardınca Diter Tsetşe qeyd edib: “Əgər komanda bu il titul qazanmasa, qorxulu heç nə baş verməyəcək – bizə bir qədər vaxt verin, bu baş verənə qədər mən sağ qalacam.”