Malayziya-2016: Yarış

Son 4 ildə Malayziya Qran Prisinin sessiyalarından ən azı biri yağışlı havada keçib. Bu dəfə payızda keçirilən yarışda ənənə pozulub - sürücülər bütün sessiyaları quru havada keçiriblər. Bazar günü hava çox isti olub. Asfalt 50 dərəcəyə qədər qızıb.

F-1.az xəbər verir ki, hər mövsüm maraqlı hadisələrlə zəngin olan Malayziya Qran Prisinin startındaca yarışın taleyinə təsir edəcək hadisələr baş verib. İlk döngədə Maks Ferstappenlə toqquşmamaq üçün əyləcə gec basan Sebastyan Fettel Niko Rosberqlə toqquşub və onun yerində fırlanaraq 21-ci yerə qədər geriləməsinə səbəb olub. Özü isə ön asılqanın qırılmasına görə yarışı dayandırmalı olub. Bütün həftəsonu boyunca olduqca güclü təsir bağışlayan Lyuis Həmilton yaxşı çıxışını yarışda da davam etdirib. Arxasındakı Red Bull sürücülərinə yaxınlaşmağa imkan verməyən Lyuis yarışın sonuna yaxın pis sürprizlə qarşılaşıb – motoru partlayan birtaniyalı sürücü yarışı dayandırmalı olub və çempionluq uğrunda olduqca əhəmiyyətli xallar itirib.

Dördüncü yerdən start alan Daniel Rikkardo startdakı insidentdən sonra komanda yoldaşı Ferstappeni də keçərək 2-ci yerə yüksəlib. Lyuisin yarışı dayandırmasına az qalmış Ferstappenə keçilən avstraliyalı əks hücumla yerini qaytarıb və başqa hücum şansı verməyib. Lyuisin problemlə üzləşməsindən sonra liderliyə yüksələn Daniel finiş xəttini birinci keçərək bu il çox gözlədiyi qələbəni, nəhayət ki, qazanıb.

Startda yer itirməsinə baxmayaraq, tez pit-stop edərək üstünlük əldə edən Ferstappen yarışın sonua qədər qələbə qazanmaq üçün çalışsa da, Rikkardoya çata bilməyəcəyini başa düşüb və ikinciliyə razı olub. O, bu il 5-ci dəfə podiuma yüksəlib.

Çempionatın lideri Rosberq üçün yarış heç də yaxşı başlamasa da, nəticə onun xeyrinə olub. Startdakı insidentdən sonra 21-ci yerə qədər geriləyən Niko əla yarışıb və rəqiblərini keçərək 5-ci yerə qədər yüksəlib. Kimi Rəykkönenə etdiyi hücumdakı təmasa görə stüardlar tərəfindən onun vaxtına 10 saniyə əlavə edilib. Buna baxmayaraq, Niko yerini qoruya bilib. Yarışın sonunda Kimi ilə arasındakı fərqi 13 saniyəyə yüksəldən alman sürücü podiuma yüksəlib və çempionatdakı xal fərqini 23-ə yüksəldərək lideriyini daha da möhkəmləndirib.

Fərqli strategiya seçərək cəmi bir dəfə təkərlərini dəyişən Valtteri Bottas 5-ci olaraq komandasına vacib xallar qazandırıb. Force İndia-nın sürücülərindən Serxio Peres 6-cı, Niko Hülkenberq isə 8-ci olublar və komanda Mühəndislər Kubokunda 4-cü yerini qoruya bilib.

Yarışa son sıradan başlayan Fernando Alonso isə yenilənmiş Honda motoru ilə möhtəşəm çıxış edib. Çoxsaylı ötmələr edən ispan sürücü 7-ci yeri tutub. Onun bu nəticəsi komandanın növbəti yarışlarda və gələn mövsümdə daha güclü olacağına ümid bəslməyə əsas verir. McLaren-in digər sürücüsü Censon Batton isə 9-cu olub və karyerasının 300-cü yarışında xal qazanmağı bacarıb. Renault-nun sürücüsü Colion Palmer isə, nəhayət ki, karyerasında ilk dəfə xal qazanmağa nail olub. Yarışda 10-cu olan britaniyalı sürücü aktivinə 1 xal yazıb.

Malayziya Qran Prisinə Mühəndislər Kubokunu ardıcıl 3-cü dəfə qazanmaq ümidi ilə gələn Mercedes AMG komandası bu istəyini ən azı bir yarışlıq təxirə salmalı olub. 2013-cü ildən bəri ilk dəfə podiumun ən yüksək iki yerini tutan Red Bull isə bu maksimum nəticə ilə Ferrari-dən bir qədər də uzaqlaşıb.

Niko Rosberq az qala 2-ci yerə düşəcəyi çempionatda Lyuisin yarışı tamamlaya bilməməsinə görə xal fərqini daha da artırıb. Aktivində 288 xal olan Nikonu Lyuisdən 23 xal ayırır. Rikkardo isə xal ehtiyatını 204-ə yüksəldib və Ferrari sürücüləri ilə arasındakı böyük xal fərqi onun mövsümü 3-cü yerdə tamamlamaq şansını artırır. Rəykkönen Fetteli keçərək 4-cü olub. Fernando Alonso isə Felipe Massanı 1 xal fərqi ilə üstələyir və artıq çempionatda 10-cu yerdədir. Bir həftə sonra bizi Yaponiyada daha gərgin mübarizə gözləyir…

Yer N Sürücü Komanda Zaman Pit
1 3 Daniel Rikkardo Red Bull 1:37.12.776 2
2 33 Maks Ferstappen Red Bull + 0:02.443 3
3 6 Niko Rosberq (*) Mercedes AMG + 0:25.516 3
4 7 Kimi Rəykkönen Ferrari + 0:28.785 3
5 77 Valtteri Bottas Williams + 1:01.582 1
6 11 Serxio Peres Force İndia + 1:03.794 2
7 14 Fernando Alonso McLaren + 1:05.205 3
8 27 Niko Hülkenberq Force İndia + 1:14.062 3
9 22 Censon Batton McLaren + 1:21.816 2
10 30 Colion Palmer Renault + 1:35.466 1
11 55 Karlos Sayns Toro Rosso + 1:38.878 2
12 9 Markus Eriksson Sauber + 1 dövrə 2
13 19 Felipe Massa Williams + 1 dövrə 3
14 26 Daniil Kvyat Toro Rosso + 1 dövrə 3
15 94 Paskal Verlyayn Manor + 1 dövrə 3
16 31 Esteban Okon (**) Manor + 1 dövrə 2

(*)  Niko Rosberq Kimi Rəykkönenlə insident yaşadığı üçün yekun nəticəsinin üzərinə 10 saniyə əlavə olunub

(**)  Esteban Okon pit yolunda sürət limitini aşdığı üçün yekun nəticəsinin üzərinə 10 saniyə əlavə olunub

Sürətli dövrə: Niko Rosberq (Mercedes AMG) – 1:36.424 (44-cü dövrə, 206.948 km/saat)

 

MÜBARİZƏNİ DAYANDIRANLAR:

Sürücü Komanda Dövrə Səbəb
Felipe Nasr Sauber 46 Əyləc sistemi
Lyuis Həmilton Mercedes AMG 40 Motor
Esteban Qutyerres Haas 39 Təkərin bağlanmaması
Kevin Maqnussen Renault 17 Əyləc problemi
Roman Qrojan Haas 7 Əyləc Problemi
Sebastyan Fettel Ferrari 0 Qəza

 

SÜRÜCÜLƏRİN ÇEMPİONATI:

Yer N Sürücü Ölkə Komanda Xal
1 6 Niko Rosberq Mercedes AMG F1 Team 288
2 44 Lyuis Həmilton Mercedes AMG F1 Team 265
3 3 Daniel Rikkardo Red Bull Racing 204
4 7 Kimi Rəykkönen Scuderia Ferrari 160
5 5 Sebastyan Fettel Scuderia Ferrari 153
6 33 Maks Ferstappen Red Bull Racing 147
7 77 Valtteri Bottas Williams Martini Racing 80
8 11 Serxio Peres Sahara Force İndia F1 Team 74
9 27 Niko Hülkenberq Sahara Force İndia F1 Team 50
10 14 Fernando Alonso McLaren Honda Formula 1 Team 42
11 19 Felipe Massa Williams Martini Racing 41
12 55 Karlos Sayns Scuderia Toro Rosso 30
13 8 Roman Qrojan Haas F1 Team 28
14 26 Daniil Kvyat Scuderia Toro Rosso 25
15 22 Censon Batton McLaren Honda Formula 1 Team 19
16 20 Kevin Maqnussen Renault Sport Formula 1 Team 7
17 30 Colion Palmer Renault Sport Formula 1 Team 1
18 94 Paskal Verlyayn Manor Racing MRT 1
19 47 Stoffel Vandorn McLaren Honda Formula 1 Team 1

 

MÜHƏNDİSLƏR KUBOKU:

Yer Komanda Motor Xal
1 Mercedes AMG F1 Team Mercedes 553
2 Red Bull Racing TAG Heuer 359
3 Scuderia Ferrari Ferrari 313
4 Sahara Force India F1 Team Mercedes 124
5 Williams Martini Racing Mercedes 121
6 McLaren Honda Formula 1 Team Honda 62
7 Scuderia Toro Rosso Ferrari 47
8 Haas F1 Team Ferrari 28
9 Renault Sport Formula 1 Team Renault 8
10 Manor Racing MRT Mercedes 1
, , , , , ,

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

*

*

*