Quru. Buludlu. Havanın temperaturu +21° C, trasın temperaturu +27° C

Ardıcıl ikinci yarışa Red Bull sürücüləri ilk cərgədən start almalı idilər – amma bir həftə əvvəl Suzukada Fettel pouldan start almışdısa, Koreyada Mark Uebber sıralanma turunda komanda yoldaşını qabaqlamışdı.

Start düzlüyündə iki sürücü cərimə olunmuşdu – Şarl Pik doqquzuncu motora görə 10 yer, Daniel Rikkardo isə ötürmələr qutusuna görə beş yer itirməli olmuşdular.

Batton, Peres, Kobayaşi, di Resta, Vern və de la Rosa starta Soft təkərlərlə çıxıblar, digər sürücülər isə SuperSoft tərkibinə üstünlük veriblər.

Startda Fettel Uebberi, Alonso isə Həmiltonu qabaqlayıblar. Kobayaşi birinci döngənin əylənməsində səhvə yol verib və Battonla Rosberqə çırpılıb, hər iki sürücü mübarizəni dayandırsa da, yaponiyalı sürücü yeni burun elementi ilə mübarizəni davam etdirib. 2-ci dövrədə ilk onluq: Fettel – Uebber – Alonso – Həmilton – Massa – Rəykkönen – Hülkenberq – Qrojan – Peres – Şumaher.

Rosberqin maşını start düzlüyünün kənarında dayandığı üçün bu sahədə sarı bayraqlar dalğalanıb və uzun müddət sürücülər DRS_dən istifadə edə bilməyiblər. Kobayaşi start insidnetinə görə pit-leyndən keçməklə cəza alıb.

13-cü dövrədə Həmilton, Hülkenberq, Qrojan, Şumhaer və Vern pit-stoplar dalğasına start veriblər. 14-cü dövrədə Uebber, Massa, Rəykkönen və Rikkardo, 15-ci dövrədə Fettel, Alonso və di Resta yeni təkər dəsti alıblar. Peres köhnə təkərlərlə trasda qaldığı üçün hamı onu keçməyə başlayıb. Kobayaşi və de la Rosa mübarizəni dayandırıblar.

18-ci dövrədə Peres mexaniklərinin yanına yönəlib. 20-ci dövrədə Massa Həmiltonu üstələyərək dördüncü yerə yüksəlib. 21-ci dövrədə Maldonado ilk pit-stopunu gerçəkləşdirib. 23-cü dövrədə Rəykkönen ötmə zonasında Həmiltonu keçib, amma növbəti döngədə Lyuis mövqeyini geri qaytarıb. 24-cü dövrədə Vern Şumaheri keçərək ilk onluğa daxil olub: Fettel – Uebber – Alonso – Massa – Həmilton – Rəykkönen – Hülkenberq – Qrojan – Rikkardo – Vern.

26-cı dövrədə Həmilton, 28-ci dövrədə di Resta, 31-ci dövrədə Qrojan, 32-ci dövrədə Uebebr, Hülkenberq və Şumaher, 34-cü dövrədə Alonso və Peres, 35-ci dövrədə Fettel, Massa, Rəykkönen və Rikkardo ikinci dəfə pit-stop ediblər.

37-ci dövrədə di Resta Şumaheri keçib. Massa Alonsodan sürətli olsa da, komandadan “sakit olmaq və mövqeyini qorumaq” əmri alıb. Qrojan Həmiltona hücum edib, fürsətdən istifadə edən Hülkenberq hər ikisini qabaqlayıb. 40-cı dövrədə ilk onluq: Fettel – Uebber – Alonso – Massa – Rəykkönen – Hülkenberq – Həmilton – Qrojan – Rikkardo – Vern.

42-ci dövrədə Həmilton daha bir pit-stop edib, SuperSoft təkərlərlə trasa qayıdan britaniyalı sürücü Verni qabaqlamağa çalışıb – amma Toro Rosso maşını düzlükdə sürətli olub. Lyuisin maşınına isə süni otluqdan bir parça ilişib və maşın sürətini itirib. 52-ci dövrədə Vern komanda yoldaşı Rikkardonu da üstələyib.

Sebastyan Fettel isə karyerasında 25-ci, mövsümdə 4-cü və ardıcıl 3-cü qələbəsini qazanaraq çempionatda ldierliyi ələ alıb. Mark Uebber finişdə ikinci olmaqla Red Bull-a dubl qazandırıb – komanda Mühəndislər Kubokunda titulu qazanamq üçün vacib addım atıb. Ferrari isə hər iki sürücüsünün kiçik dublu sayəsində McLaren komandasını qabaqlayıb.

İkihəftəlik fasilədən sonra bizi daha iki cütləşmiş yarış – Hindistan və Abu Dabi Qran Priləri gözləyir, titula namizədlərin sayı hər yarışdan sonra azalır – mövsümün sonu maraqlı olacaq!

Sürətli dövrə: Mark Uebber (Red Bull) – 1:42.037 (54-cü dövrə).

Turnir cədvəli:

Quru. Buludlu. Havanın temperaturu +21° C, trasın temperaturu +25° C

Koreya Qran Prisinə qədər Red Bull sürücüləri mövsümün bütün yarışlarında pouldan start almışdılar, yalnız 16-cı mərhələdə rəqiblər bu seriyanı poza biliblər – sıralanma turunda Lyuis Həmilton birinci olub, amma hamı bilirdi ki, yarışın gedişində start mövqeyi deyil, təkərlərin yeyilmə dərəcəsi həlledici faktor olacaq.

Startda Həmilton poulun üstünlüyünü saxlaya bilib, amma artıq dördüncü döngədə Fettel irəli çıxıb. Uebber üçüncülüyə yüksəlib, Batton üç mövqe itirib, Şumaher iki mövqe qazanıb.

Avtodroma yağış dolu buludlar yaxınlaşsa da, bu dəfə yağış bir neçə damçı ilə kifayətlənib.

14-cü dövrədə Batton və Rosberq təkərlərini dəyişiblər, Mercedes GP-nin mexanikləri daha cəld tərpəniblər – Niko trasa Censonun önündə qayıdıb, amma bir neçə döngədən sonra britaniyalı sürücü status-kvonu bərpa edib. 15-ci dövrədə Uebber, Massa, Petrov və Şumaher pit-stop keçiriblər, 16-cı dövrədə Həmilton və Alonso boksa baş çəkiblər.

17-ci dövrədə Fettel təkərlərini dəyişib və bu an Təhlükəsizlik Maşını (TM) trasa çıxıb – Petrov və Şumaher üçüncü döngədə toqquşublar: Mixaelin maşını trasda qalıb, Vitaliy isə boksa qayıdıb və kokpiti tərk edib. Restartda vəziyyət dəyişməyib. Stüardlar Maldonadonu boksa düzgün girmədiyi üçün pit-leyndən keçməklə cərimə ediblər.

27-ci dövrədə Massa Rosberqi keçərək beşinciliyə yüksəlib, Niko əylənmədə təkərlərini zədələdiyi üçün vaxtından əvvəl pit-stopa yönəlib. 31-ci dövrədə Maldonado boksda maşınını tərk edib.

34-cü dövrədə Həmilton və Uebber təkərlərini dəyişiblər, 35-ci dövrədə Fettel, Batton və Massa mexaniklərin qonağı olublar. Mark və Lyuis bir neçə dəfə mövqelərini dəyişsələr də, Lyuis avstraliyalı sürücünün önündə qalıb. 38-ci dövrədə Alonso təkərlərini dəyişib.

49-cu dövrədə Uebber bir daha Həmiltonu keçib, amma Lyuis bu dəfə də mövqeyini geri qaytarıb. Arxada isə Alonso Battona hücum məsafəsinə yaxınlaşıb, amma Yonamda hətta DRS_lə ötmək çətin məsələyə çevrilib.

Sebastyan Fettel mövsümdə 10-cu, karyerasında isə 20-ci qələbəsini qazanıb. Red Bull isə vaxtından əvvəl Mühəndislər Kubokuna sahib çıxıb. Titullar sahiblərini tapıb, amma iki həftədən sonra bizi ilk Hindistan yarışı gözləyir. Maraqlı olacaq!

Sürətli dövrə: Sebastyan Fettel (Red Bull) – 1:39.605(55-ci dövrə).

Turnir cədvəli: