Kanada-2017: Sıralanma turu

Kanadada poulu qazanmaq çox da böyük əhəmiyyət daşımır, çünki trasın konfiqurasiyası ötmələrə imkan verir. Lakin burada son 10 ildə 6 dəfə pouldan başlayan sürücü qalib gəlib. Lyuis Həmilton bunu dörd dəfə bacarıb və bu qələbələrdən ikisi son iki yarışa təsadüf edir.

F-1.az xatırladır ki, sərbəst yürüşlərdə Ferrari bir qədər öndə görünürdü. Həmilton ilk sessiyanı qalib kimi başa vurmuşdusa da, Rəykkönen dünən ikinci sessiyada hamını üstələmişdi. Bu gün səhər baş tutan üçüncü sessiyada isə italyan komandanın sürücüləri ilk iki yerdə qərarlaşmışdılar, lakin bu dəfə Fettel protokollara başçılıq etmişdi.

Pirelli Kanadaya ən yumşaq üçlüyü – Soft, SuperSoft və UltraSoft tərkibləri gətirib. Sıralanma turundan əvvəl asfaltın temperaturu +40 dərəcəyə çatlıb ki, bu da təkərlərin qızdırılmasına kömək edib.

Birinci sessiyada Ferrari sürücüləri SuperSoft, qalan sürücülər isə UltraSoft təkərlərlə boksları tərk ediblər. Hamının trasda olması sıxlıq yaradıb və sürücülər bir-birilərinə mane olublar. Vandorn, Rəykkönen və Verlyayn asfaltdan çıxsalar da, maşınlara zərər dəyməyib və sessiyanı davam etdiriblər. Lakin sessiyanın sonunda Verlyayn birinci döngədə idarəetməni itirib və bariyerlərə çırpılıb. Bottas protokollara başçılıq edib – 1:12.685. Vandorn, Stroll, Maqnussen, Eriksson və Verlyayn mübarizəni dayandırıblar.

İkinci sessiyada bütün sürücülər UltrSoft təkərlərlə trasa çıxıblar. Həmilton ilk cəhddən liderliyi ələ alıb, növbəti cəhdində isə nəticəsini daha da yaxşılaşdırıb – 1:12.496. Bottas və Rəykkönen ona 0.1 saniyədən az uduzublar. Fettel isə ikinci cəhdindən imtina edib. Mübarizəni dayandıran sürücülər isə Kvyat, Alonso, Sayns, Qrojan və Palmer olublar.

Son sessiyada Fettel ilk cəhddə liderliyi ələ alsa da, Həmilton olduqca sürətli dövrə vuraraq onu böyük fərqlə üstələyib – 1:11.791. Bütün sürücülər boksa yollansalar da, Fettel dövrələrini davam etdirib və ikinci sektorda səhvə yol verməsinə baxmayaraq, Həmiltona cəmi 0.004 saniyə uduzub. Sessiyanın sonunda bütün sürücülər trasa qayıdıblar. Həmiltonun növbəti sürətli dövrəsi isə möhtəşəm olub – 1:11.459! Bu, həm də trasın yeni rekordudur.

Bu, Lyuisin karyerasında 65-ci, cari mövsümdə dördüncü, Kanadada isə altıncı pouludur. Britaniyalı sürücü poul sayına görə Ayrton Sennaya çatıb. Daha üç poul qazanarsa, Mixael Şumaxerlə bərabərləşəcək. Sıralanma turundan sonra Sennanın ailəsi Lyuisə əfsanəvi sürücünün dəbilqələrindən birini təqdim edib.

Sabah bizi olduqca maraqlı yarış gözləyir. Həmiltondan 0.3 saniyə geri qalan Fettel yarışa ikinci yerdən başlayacaq. Bottas üçüncü, Rəykkönen isə dördüncü yerdən start alacaq. Üçüncü cərgə isə yenə də Red Bull sürücüləri tərəfindən zəbt olunub.

Kanada Qran Prisi sabah Bakı vaxtı ilə 22:00-da start götürəcək…

Yer	N	Sürücü	Komanda	1-ci sessiya			2-ci sessiya			3-cü sessiya
Yer	N	Sürücü	Komanda	Yer	Zaman	Dövrə	Yer	Zaman	Dövrə	Zaman	Dövrə
1	44	Lyuis Həmilton	Mercedes AMG	2	1:12.692	6	1	1:12.496	8	1:11.459	7
2	5	Sebastyan Fettel	Ferrari	3	1:13.046	8	4	1:12.749	4	1:11.789	9
3	77	Valtteri Bottas	Mercedes AMG	1	1:12.685	6	2	1:12.563	7	1:12.177	7
4	7	Kimi Rəykkönen	Ferrari	9	1:13.548	7	3	1:12.580	9	1:12.252	7
5	33	Maks Ferstappen	Red Bull	4	1:13.177	9	5	1:12.751	9	1:12.403	8
6	3	Daniel Rikkardo	Red Bull	8	1:13.543	10	6	1:12.810	10	1:12.557	8
7	19	Felipe Massa	Williams	5	1:13.435	10	7	1:13.012	9	1:12.858	8
8	11	Serxio Peres	Force İndia	6	1:13.470	6	8	1:13.262	8	1:13.018	8
9	31	Esteban Okon	Force İndia	7	1:13.520	6	9	1:13.320	9	1:13.135	7
10	27	Niko Hülkenberq	Renault	13	1:13.804	8	10	1:13.406	10	1:13.271	6
11	26	Daniil Kvyat	Toro Rosso	12	1:13.802	11	11	1:13.690	7
12	14	Fernando Alonso	McLaren	10	1:13.669	10	12	1:13.693	8
13	55	Karlos Sayns	Toro Rosso	15	1:14.051	11	13	1:13.756	8
14	8	Roman Qrojan	Haas	11	1:13.780	11	14	1:13.839	10
15	30	Colion Palmer	Renault	14	1:13.990	11	15	1:14.293	9
16	2	Stoffel Vandorn	McLaren	16	1:14.182	11
17	18	Ləns Stroll	Williams	17	1:14.209	14
18	20	Kevin Maqnussen	Haas	18	1:14.318	11
19	9	Markus Eriksson	Sauber	19	1:14.495	11
20	94	Paskal Verlyayn	Sauber	20	1:14.810	10