Kanada-2016: Sıralanma turu

Monrealda sıralanma turu prinsipial əhəmiyyət daşımır - son iyirmi ildə Kanada yarışında cəmi 8 dəfə pouldan start alan sürücü qalib gəlib. Amma buradakı sıralanma turu mövsümdə ilk dəfə asfalta yatma qüvvəsinin az kəmiyyətinə sazlanmış maşınların qüvvələr nisbətini dəyərləndirməyə imkan verir.

Digər faktorlar da var idi. Renault hələ iki həftə əvvəl Monakoda daxili yanma mühərriyinin yeni versiyasını təqdim etmişdi, Kanadada isə bu yenilik Renault Sport F1 və Red Bull komandalarının bütün maşınında qurulmuşdu. Ferrari və Honda Monreala yenilənmiş turbin gətirmişdilər – Kanada trası güc qurğusunun effektivliyinə çox tələbkardır. Bir çox komandalarda maşının aerodinamik konfiqurasiyası ciddi yenilənmişdi.

F-1.az xatırladır ki, sərbəst yürüşlərdə sürücülər soyuq havadan gileyləniblər – Pirelli-nin hətta ən yumşaq təkərlərini işçi rejimə çatdırmaq çox çətin olub. Monakoda olduğu kimi, sürücülər dövrələr seriyasında çalışmalı olublar. Cümə günü hər iki sessiyada Lyuis Həmilton protokollara başçılıq etsə də, bu gün səhər Sebastyan Fettel hamıdan sürətli olub.

Bu gün səhər Kevin Maqnussen 7-ci döngənin çıxışında qəzaya uğrayıb, komanda Monakodakı qəzadan sonra buraya yeni şassi gətirmişdi. Mexaniklər zədələnmiş maşını sıralanma turunun startına kimi bərpa edib qurtara bilməyiblər, ona görə də Kevin boksdan çıxmayıb.

Gün ərzində yağış bir neçə dəfə damcılasa da, asfalt quru olub və sürücülər trasa sliklərdə yollanıblar.

İlk sessiyaya Force İndia komandasının sürücüləri SuperSoft təkərlərlə başlayıblar, digər sürücülərin seçimi isə UltraSoft olub. Sürücülər trasın bir neçə yerində yağış damcılarının düşdüyünü bildiriblər. Colion Palmer “çempionlar divarı”na sürtünüb, amma qəzadan qurtulub.

Haryanto 4-cü döngənin çıxışında baryerlərə toxunub, sağ arxa təkəri deşilən sürücü trasda dayanmalı olub. Protokollara Rosberq başçılıq edib – 1:13.714, mübarizəni isə Renault, Sauber və Manor komandaları tam heyətlə dayandırıblar.

İkinci sessiyaya hamı UltraSoft təkərlərlə başlayıb. Karlos Sayns “çempionlar divarı”na çırpılaraq mübarizəni dayandırıb. Sessiya qırmızı bayraqlarla dayandırılıb. Qırıntılar yığışdırılıb, 8 dəqiqədən sonra sessiyaya restart verilib.

Həmilton protokollara başçılıq edib – 1:13.076, Rosberq ona cəmi 0.018 saniyə uduzub. Peres, Batton, Kvyat, Qutyerres, Qrojan və Sayns üçün mübarizə başa çatıb.

Son sessiyada Rəykkönen və Massa ilk cəhdlərinə çıxmayıblar, Həmilton isə ilk cəhdində liderliyi əla alıb – 1:12.812. Rikkardo və Fettel “çempionlar divarı”na sürtünüblər, amma mübarizəni davam etdiriblər.

Son cəhdində liderlər nəticələrini yaxşılaşdıra bilməyiblər, Fettel 3-cü yerə yüksəlib, Rikkardo isə Ferstappeni üstələyib.

Lyuis Həmilton Monrealda sıralanma turunda qalib gələrək karyerasında 53-cü, mövsümdə 4-cü və Jil Vilnöv adına trasda 5-ci poulunu qazanıb. Niko Rosberq ikinci nəticə göstərib – Mercedes AMG sürücüləri yenə də ilk cərgəni tam heyətlə zəbt ediblər. İkinci cərgədən Fettel və Rikkardo start alacaqlar. Ferstappen və Rəykkönen birinci döngədə komanda yoldaşlarını qabaqlamağa çalışacaqlar.

Yarışın startı və gedişi maraqlı olmalıdır…

Yer N Sürücü Komanda 1-ci sessiya 2-ci sessiya 3-cü sessiya
Yer Zaman Dövrə Yer Zaman Dövrə Zaman Dövrə
1 44 Lyuis Həmilton Mercedes AMG 4 1:14.121 7 1 1:13.076 6 1:12.812 8
2 6 Niko Rosberq Mercedes AMG 1 1:13.714 6 2 1:13.094 6 1:12.874 7
3 5 Sebastyan Fettel Ferrari 2 1:13.925 8 7 1:13.857 8 1:12.990 8
4 3 Daniel Rikkardo Red Bull 3 1:14.030 6 3 1:13.540 6 1:13.166 8
5 33 Maks Ferstappen Red Bull 7 1:14.601 8 5 1:13.793 8 1:13.414 8
6 7 Kimi Rəykkönen Ferrari 6 1:14.477 7 6 1:13.849 10 1:13.579 6
7 77 Valtteri Bottas Williams 5 1:14.389 8 4 1:13.791 5 1:13.670 7
8 19 Felipe Massa Williams 12 1:14.815 9 8 1:13.864 9 1:13.769 3
9 27 Niko Hülkenberq Force İndia 8 1:14.663 4 9 1:14.166 11 1:13.952 8
10 14 Fernando Alonso McLaren 14 1:15.026 8 10 1:14.260 8 1:14.338 8
11 11 Serxio Peres Force İndia 11 1:14.814 8 11 1:14.317 10
12 22 Censon Batton McLaren 10 1:14.755 8 12 1:14.437 8
13 26 Daniil Kvyat Toro Rosso 13 1:14.829 8 13 1:14.457 8
14 21 Esteban Qutyerres Haas 15 1:15.148 12 14 1:14.571 13
15 8 Roman Qrojan Haas 16 1:15.444 12 15 1:14.803 12
16 55 Karlos Sayns Toro Rosso 9 1:14.714 8 16 1:21.956 3
17 30 Colion Palmer Renault 17 1:15.459 11
18 94 Paskal Verlyayn Manor 18 1:15.599 9
19 9 Markus Eriksson Sauber 19 1:15.635 11
20 12 Felipe Nasr Sauber 20 1:16.663 9
21 88 Rio Haryanto Manor 21 1:17.052 9
22 20 Kevin Maqnussen Renault 22 0
, , , ,

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

*

*

*