İspaniya-2018: Yarış

F-1.az xatırladır ki, Mercedes komandası mövsümün ilk Avropa yarışında elə cümə günündən öz gücünü göstərmişdi. Hər üç sərbəst yürüşdə qalib gələn “gümüşü oxlar”ın sürücüləri sıralanma turunda ilk iki yeri tutmuşdular. Həmilton karyerasında 74-cü poulunu qazanarkən, Bottas ona cəmi 0.04 saniyə fərqlə uduzmuşdu.

Sergey Sirotkin Bakıdakı insidentə görə startda üç yer itirib, sıralanma turunda iştirak edə bilməyən Brendon Hartli isə stüardlar tərəfindən startda buraxılıb. Start düzümündə ilk cərgəni Mercedes, ikinci cərgəni Ferrari, üçüncü cərgəni isə Red Bull sürücüləri zəbt ediblər.

Pirelli bura orta üçlüyü – Medium, Soft və SuperSoft tərkiblərini gətirib. SuperSoft təkərlərin yaxşı işləməməsi sürücüləri daha sərt tərkiblərdən istifadəyə məcbur edib. Yarışa ancaq Alonso həftəsonunun ən yumşaq tərkibi ilə başlayıb. Eriksson Medium, yerdə qalan sürücülər isə Soft təkərlərlə start alıblar.

Həmilton startda mövqeyini qoruyub, Fettel isə Bottası keçib. Sayns və Alonso təmas yaşayıblar və McLaren-in təcrübəli sürücüsü bir neçə yer itirib. Üçüncü döngədə Maqnussen Qrojanın önündə əyləcə basıb və onu çaşdırıb. Fransız sürücü idarəetməni itirib, Hülkenberq və Qasli ilə toqquşub. Nəticədə hər üç sürücü mübarizəni dayandırıb. Təhlükəsizlik Maşını trasa çıxıb. 2-ci dövrədə ilk onluq: Həmilton – Fettel – Bottas – Rəykkönen – Ferstappen – Rikkardo – Maqnussen – Sayns -Lekler – Okon.

Hartli və Sirotkin pit-stop ediblər və Medium təkərlərə keçiblər. 6-cı dövrədə restart verilib, Həmilton yenə də keçilməyib. Maqnussen Saynsı, Alonso isə Okonu üstələyib. Həmilton cəmi iki dövrə ərzində fərqi iki saniyəyə qaldırıb. Vandorn ikinci döngədə trasdan çıxdıqdan sonra məhdudiyyət sütunun sağından deyil, solundan trasa qayıtdığı üçün stüardlar tərəfindən 5 saniyəlik cərimə alıb.

Fettel 18-ci, Bottas isə 20-ci dövrədə təkərlərini dəyişib. Valtteri bir qədər pitdə gecikib və nəticədə Fettellə Maqnussenin arxasında trasa qayıdıb. Növbəti iki dövrədə Lekler, Stroll və Alonso da pit-stop ediblər. Yarışın 25-ci dövrəsində Rəykkönenin maşını güc itirib. Yavaş-yavaş boksa qayıdan Ferrari sürücüsü üçün mübarizə başa çatıb.

Həmilton 26-cı dövrədə pit yoluna üz tutub. Trasda daha çox qalan Red Bull sürücülərindən Rikkardo 34-cü, Ferstappen isə 35-ci dövrədə pit-stopa çağrılıb. 38-ci dövrədə ilk onluq: Həmilton – Fettel – Bottas – Ferstappen – Rikkardo – Maqnussen – Sayns – Lekler – Alonso – Peres.

40-cı dövrədə Okonun maşını tüstülənib və yarışı yarımçıq saxlamalı olub. Onun maşınının təxliyə edilməsi üçün Virtual Təhlükəsizlik Maşını rejimi elan edilib. Fettel və Peres pit-stop ediblər, Fettel trasa düz Ferstappenin arxasında qayıdıb. Üç dövrə sonra Sirotkin yerində fırlanıb. O, dərhal təkərlərini dəyişməyə yollanıb. Ferstappen Strolla toqquşmada ön qanadını zədələyib. Peres Strollu keçib. Alonso uzun müddət çalışdıqdan sonra, nəhayət, Lekleri üstələməyi bacarıb. 44-cü dövrədə ilk onluq: Həmilton – Bottas – Ferstappen – Fettel – Rikkardo – Maqnussen – Sayns – Alonso – Lekler – Peres.

47-ci dövrədə Vandorn ötürmələr qutusunda yaranmış nasazlığa görə mübarizəni dayandırıb. Peres sona 7 dövrə qalmış Lekleri də keçərək daha bir pillə irəliləyib. Buludlar trasın üzərinə toplansa da, yağış yağmayıb.

Lyuis Həmilton mövsümdə ardıcıl ikinci, karyerasında 64-cü qələbəsini qazanıb və çempionatda növqeyini daha da möhkəmləndirib. Bottasın ikinci olması ilə Mercedes mövsümdə ilk dəfə yarışı dubl edərək başa vurub. Ferstappen isə üçüncü olaraq builki ilk podiumunu əldə edib. Yalnız top komandaların sürücüləri yarışı liderlə eyni dövrədə bitirə biliblər. Şarl Lekler ardıcıl ikinci yarışı xalla başa vurub.

Mübarizə iki həftə sonra Monakonun dar küçələrində davam edəcək…

Sürətli dövrə: Daniel Rikkardo (Red Bull) – 1:18.441 (61-ci dövrə, 213.638 km/saat).

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	44	Lyuis Həmilton		Mercedes AMG Petronas Motorsport	95
2	5	Sebastyan Fettel		Scuderia Ferrari	78
3	77	Valtteri Bottas		Mercedes AMG Petronas Motorsport	58
4	7	Kimi Rəykkönen		Scuderia Ferrari	48
5	3	Daniel Rikkardo		Aston Martin Red Bull Racing	47
6	33	Maks Ferstappen		Aston Martin Red Bull Racing	33
7	14	Fernando Alonso		McLaren F1 Team	32
8	27	Niko Hülkenberq		Renault Sport Formula 1 Team	22
9	20	Kevin Maqnussen		Haas F1 Team	19
10	55	Karlos Sayns		Renault Sport Formula 1 Team	19
11	11	Serxio Peres		Sahara Force İndia F1 Team	17
12	10	Pyer Qasli		Red Bull Toro Rosso Honda	12
13	16	Şarl Lekler		Alfa Romeo Sauber F1 Team	9
14	2	Stoffel Vandorn		McLaren F1 Team	8
15	18	Ləns Stroll		Williams Martini Racing	4
16	9	Markus Eriksson		Alfa Romeo Sauber F1 Team	2
17	31	Esteban Okon		Sahara Force İndia F1 Team	1
18	28	Brendon Hartli		Red Bull Toro Rosso Honda	1

MÜHƏNDİSLƏR KUBOKU: