Çin Qran Prisindən sonra FİA-nın ekspertləri arxa antiqanadın idarəolunan elementinin effektliyini təhlil edəcəklər – havaya qarşı müqaviməti azaldan sistem (DRS) ötmələrə nə dərəcdə təsir edir…
Komandalar və sürücülər bu yeniliyi kəskin tənqid atəşinə tutublar – hamı sistemin effektliyindən, istifadə reqlamentindən və fedrasiyanın təyin etdiyi ötmə zonasından narazıdır. Mövsümün ilk üç yarışında FİA məlumat toplayacaq və Çin Qran Prisindən sonra reqlament dəqiqləşdiriləcək – çox güman ki, bəzi traslarda ötmə zonalarının sayı artacaq.
Çarli Uaytinq, yarışların direktoru: “Melburnda sistem kifayət qədər effektiv deyildi – Albert Parkda start düzlüyü qısadır və ilk döngə çox sürətlidir. Biz DRS sisteminin işini Malayziyada və Çində izləyəcəyik, bundan sonra isə reqlamentə düzəlişlər edəcəyik.”
