Barselona yaxınlığında Katalunya trasında yerli vaxtla saat 9:00-da mövsümöncəsi testlərin sonuncu seriyasının ikinci günü start alıb. Hava komandaların səbirləri ilə oynamağa davam edir: trasın üzərində qara buludlar toplaşıb, tras nəmdir, havanın temperaturu cəmi +8 dərəcədir.
Komandaların çoxunda sürücü dəyişikliyi olub, bu gün sükan arxasında Sebastyan Fettel (Red Bull), Fernando Alonso (Ferrari), Censon Batton (McLaren), Roman Qrojan (Lotus), Niko Rosberq (Mercedes AMG), Niko Hülkenberq (Sauber), Adrian Sutil (Force İndia), Pastor Maldonado (Williams), Daniel Rikkardo (Toro Rosso), Xido van der Xarde (Caterham) və Maks Çilton (Marussia) işləyəcəklər.
