Avstriya-2017: Tras və statistika

Formula1-də iki komandanın sahibi olan Mateşiç əvvəlcə avtodromu rekonstruksiya etdi, bir neçə ildən sonra isə milli mərhələyə dəstək verdi. Təşkilatçılar deyirdilər ki, bilet satışından əldə edilən gəlir yalnız cari xərcləri qarşılayacaq, amma Mateşiç üçün bu layihənin xüsusi statusu var idi – məhz Diter yarış haqqını Berni Ekklstouna ödəmişdi.

Ştiriya dağlarında yerləşən tras həmişə tarxi yarışlara şahidlik edib, 2011-ci ildən isə avtodromun tarixində yeni era başlayıb. Həmin il trasda Formula2 və DTM yarışları keçirildi, amma F1 yarışları barədə düşünmürdülər. Hətta Mateşiç yerli KİV-ə müsahibəsində demişdi ki, tras gənc sürücülərin çıxış etdiyi seriyalar üçün nəzərdə tutulub.

Avstriya Qran Prisinin təqvimə qayıtması barədə Red Bull komandasının Qrats şəhərində baş tutan küçə şousu zamanı danışmağa başladılar. Sonra məlum oldu ki, FİA 2013-cü ilin təqvimində iyul ayına adı məlum olmayan bir yarış planlaşdırıb və Red Bull şirkətinin idman məsləhətçisi federasiyaya xatırlatdı ki, Şpilberq avtodromu F1 yarışları keçirmək lisenziyasına malikdir. Yanvar ayında Mateşiç bəyan etdi ki, Ekklstounla 3 və ya 5 illik müqaviləni müzakirə edir, 2013-cü il iyulun əvvəllərində isə bütün sənədlər imzalanmışdı.

Təqvimə qayıdan Avstriya yarışı hamının xoşuna gəldi – sürücülər, komandalar, azarkeşlər və mətbuat ilk yarışdan razı qalmışdılar. 2014-cü ildə debüt yarışını 225 min tamaşaçı izləmişdisə, növbəti illərdə onların sayı xeyli azalmışdı.

TRASIN XARAKTERİSTİKASI

Trasın konfiqurasiyası əvvəlki versiyadan fərqlənmir, sadəcə müasir standartlara cavab verəcək hala gətirib – təhlükəsizlik zonaları genişləndirilib, bəzi sahələrdə TecPro baryerləri quraşdırılıb, yeni mətbuat mərkəzi və digər qurğular tikilib. Köhnə klassik trasa müasir don geydirilib.

Döngələrin çoxu adını dəyişib – köhnələrdən yalnız Yoxen Rindt döngəsi qalıb, Niki Laudanın adını daşıyan döngə hazırda Pirelli adlanır. Bundan narazı qalan Lauda bildirmişdi ki, “onun vaxtında döngələr üçün sponsor axtarmırdılar”.

Trasın uzunluğu qısa olduğu üçün dövrə çox tez başa vurulur – Monakonu saymasaq təqvimdə yalnız  Mexiko və San Paulu traslarından uzundur. Yavaş döngələrin və düzlüklərin uzlaşması asfalta yatma qüvvəsi və sürət arasında sazlanmalar seçimində kompromiss tələb edir.

Tras cəmi 10 döngədən ibarətdir, birinci sektordakı uzun düzlüyün sonunda ötmək mümkündür. Əvvəllər bu trasda yarışlar darıxıdırıcı olurdular, amma DRS və ERS sürücülərə ötmək imkanı verir.

Dörd düzlük qaz pedalının tam döşəməyə basılması ilə qət olunur, döngələrin azlığı əylənmə zamanı MGU-K generatora enerjinin toplanmasını çətinləşdirir. Ümumən, əyləc və təkərlərin yüklənməsi yüksək deyil. Dəniz səviyyəsindən 640 metr hündürlükdə olması üzündən havanın alçaq təzyiqini kompensə etmək üçün trasda maşınların turbini daha böyük dövriyələrdə çalışmalı olacaq.

TELEYAYIM

F-1.az xatırladır ki, Azərbaycanda bütün çempionatın yayım hüquq İdman Azərbaycan kanalında olduğu üçün Avstriya Qran Prisini İdman Azərbaycan və ya İdman Azərbaycan HD kanallarından izləyə bilərsiniz. Hər bir sessiyanın rəsmi protokolları isə saytımızda operativ yerləşdiriləcək…

HƏFTƏSONU ÜÇÜN SÜRÜCÜLƏRİN TƏKƏR SEÇİMİ

Avstriyada komandalar mövsümdə beşinci dəfə ən yumşaq üçlüyü – UltraSoft, SuperSoft və Soft tərkiblərini alacaqlar. Keçən il yarışın gedişində bir və iki pit-stoplu strategiyalar tətbiq olunmuşdu, çox güman ki, bu il də eyni gedişi izləyəcəyik. Amma çox şey havadan asılı olacaq – həftəsonu gərgin mübarizə görəcəyik…

STATİSTİKA