Quru. Günəşli. Havanın temperaturu +24° C, trasın temperaturu +43° C

Silverstounda təkərlərlə bağlı ciddi problemlərdən sonra Pirelli şirkəti Almaniya Qran Prisinə yeni arxa təkərlər gətirib – bu təkərlərin əsasında polad deyil, kevlar təbəqədən istifadə olunub. Almaniya yarışı keçid xarakteri daşıyır – 3 həftədən sonra Macarıstanda komandalar tam yeni təkərlər alacaqlar.

Dünən sürücülər daha yumşaq Soft tərkibinin vaxtından əvvəl dənlə örtülməsindən və daha tez yeyilməsindən gileylənirdilər, amma qeyd edirdilər ki, Soft sıralanma turunda əsas seçim olacaq – daha stabil Meduim tərkibi ilə bir dövrədə sürət fərqi bəzi maşınlarda 1.5 saniyəyə çatıb. Uik-endin gedişində təkiblərin fərqi, onların maşının sürətinə təsiri akitv müzakirə olunub və sıralanma turu sürətli dövrədə qüvvələr nisbətini qiymətləndirmək imkanı verib.

Sıralanma turu ərəfəsində asfaltın temperaturu +40 dərəcəni keçib və komandalar sazlanmalara düzəlişlər ediblər ki, təkərlər effektiv diapazonda işləsinlər. Pirelli-nin məsləhəti ilə komandalar təkərlərdə təzyiqi və təkərlərin maşında üfüqi və şaquli kənarlaşma bucaqlarını nəzərə alıblar.

Birinci sessiyada yalnız Red Bull və Mercedes AMG sürücülər Medium təkərlərlə çıxıblar, autsayderlər üzərində üstünlük onlara növbəti sessiyaya keçməyə imkan verib. Protokollara Felipe Massa başçılıq edib – 1:30.574, mübarizəni isə Williams, Caterham və Marussia komandaları tam heyətlə dayandırıblar.

İkinci sessiyada hamı Soft təkərlərinə keçib, mübarizə çox gərgin olub. Ən yaxşı nəticəni yenə də Massa göstərib – 1:29.825. Niko Rosberq komandanın qurbanı olub və mübarizəni dayandırıb, onunla birlikdə di Resta, Peres, Qutyerres, Sutil və Vern də son sessiyaya keçə bilməyiblər.

Poul uğrunda mübarizə də gərgin olub. İlk cəhdindən sonra Həmilton protokollara başçılıq edib – 1:29.540. Alonso, Massa və Batton Medium tərkiblə trasa çıxıblar. Son dəqiqədə Fettel birinciliyə yüksəlsə də, Həmilton daha sürətli olub – 1:29.398. Batton və Hülkenberq isə dövrələrini tamamlamayıblar.

Həmilton mövsümdə 3-cü, karyerasında isə 29-cu poulunu qazanıb. Onunla birlikdə ilk cərgədən Fettel yarışa start alacaq, ikinci cərgədən Uebber və Rəykkönen onlara hücum edəcəklər. Yarışın ilk hissəsinə daha bərk təkərlər seçmiş Ferrari sürücüləri dördüncü cərgədən start alacaqlar…

Yağış. Buludlu. Havanın temperaturu +17° C, trasın temperaturu +23° C

Ardıcıl ikinci uik-end dəyişkən hava Qran Prinin həlledici faktoruna çevrilir. Silverstounda da cümə günü komandalar tam işləyə bilməmişdilər, orda da həm quru, həm keçid, həm də yağış təkərlərlə sürücülər sərbəst yürüşlərdə işləmişdilər.

Sıralanma turundan əvvəl 3 sürücü bilirdi ki, sabah yarışın startında 5 yer itirəcəklər – Qrojan, Rosberq və Uebber.

Birinci sessiyada sürücülər hələ quru olan asfaltda yaxşı nəticə göstərməyə tələsiblər. Trasın vəziyyəti hər dövrədən sonra yaxşılaşıb, sessiyanın sonunda zəif komandalar hətta Soft təkərlərə keçiblər. Protokollara Kimi Rəykkönen başçılıq edib – 1:15.693, mübarizəni isə “yeni” komandaların sürücüləri ilə birlikdə Jan Erik Vern dayandırıb. Sürücülərin hamısı 107%-lik səddi keçə biliblər.

Fasilə zamanı yağış başlayıb, ona görə də sürücülər trasa keçid təkərlərlə çıxmağa tələsiblər və öndə olan sürücülər üstünlük qazanıblar. Tədricən yağış güclənib və ağır yağış təkərlərinə keçən sürücülər nəticələri yaxşılaşdıra bilməyiblər. Protokollara Lyuis Həmilton başçılıq edib – 1:37.365, mübarizəni isə Rikkardo, Peres, Kobayaşi, Massa, Qrojan, Senna və Rosberq dayandırıblar.

Fasilədə yağış dayanıb, amma sürücülər sonuncu sessiyaya ağır yağış təkərləri ilə çıxıblar. Tədricən trayektoriya sudan təmizləndiyi üçün hər bir sürücü protokollara başçılıq etməyə başlayıb. Poulun taleyi sonuncü dövrələrdə həll olunub. İki həftə əvvəl Silverstounda olduğu kimi bu dəfə də Alonso birinci olub, ispaniyalı sürücü karyerasındakı 22-ci poulunu sabah qələbəyə çevirməyə cəhd edəcək. Onunla birlikdə birinci cərgədən son iki ilin dünya çempionu Sebastyan Fettel start alacaq, arxadan Şumaher və Hülkenberq birinci döngədə onlara hücum edəcəklər…

Quru. Buludlu. Havanın temperaturu +14° C, trasın temperaturu +22° C

Nürburqrinqə qədər mövsümün bütün poullarını Red Bull sürücüləri öz aralarında bölüşdürmüşdülər, amma son Qran Prilərdə rəqiblər ciddi tərəqqi etdiyindən bugünkü sıralanma turunda qüvvələr nisbətində dəyişiklik gözlənilirdi.

Dünən və bu gün yağışlı proqnozlara baxmayaraq, trasa yalnız bir neçə damcı düşüb. Pirelli-nin Medium və Soft tərkibləri arasında sürət fərqi bu dəfə dövrədə iki saniyə təşkil edib, ona görə də sürücülər yarışa maksimum təzə təkər dəsti saxlamağa çalışıblar.

Birinci sessiyada güclü komandaların sürücüləri Medium tərkibinə ütsünlük verdiyi halda, Felipe Massa adəti üzrə yumşaq təkərlərlə trasa çıxıb və protokollara başçılıq edib. Yeni komandaların sürücüləri ilə birlikdə Kamui Kobayaşi mübarizədən kənar qalıb. Bütün sürücülər 107%-lik həddi keçə bildikləri üçün sabah yarışın startına çıxacaqlar.

İkinci sessiyada isə bütün sürücülər yumşaq təkərlərlə işləyiblər. Red Bull, Ferrari və McLaren sürücüləri yalnız bir cəhdlə kifayətlənsələr də, rəqibləri yerdə qalan 4 yer uğrunda ciddi mübarizə aparıblar – nəticədə Haydfeld, di Resta, Maldonado, Barrikello, Peres, Buemi və Algersuari son sessiyaya keçə bilməyiblər.

Son sessiyada isə sürətlər artıb – Red Bull sürücüləri hamıdan sürətli olduqlarını elə birinci cəhdlərində sübut ediblər: Uebber Fetteli 0.1 saniyə qabaqlayıb. Mövsümün liderləri bu dəfə ikinci cəhdlərinə də çıxıblar və Uebber nəticəsini bir qədər də yaxşılaşdırıb. Avstraliyalı sürücü karyerasında 9-cu, mövsümdə isə 3-cü poulunu qazanıb. Gözlənilmədən Həmilton ikinci nəticə göstərib, Fettel isə mövsümdə ilk dəfə üçüncü yerdən start alacaq.